- Руханият
- 02 Маусым, 2022
БІШКЕКТЕГІ АБЫЗ АБАЙ
Әсел САРҚЫТ
«Ana tili»
Қасым-Жомарт Тоқаев Садыр Жапаровтың шақыруымен Қырғызстанға ресми сапармен барды. Қазақ-қырғыз қарым-қатынастары туралы бірқатар құжаттарға қол қойылды. Осы сапар аясында Бішкекте Абайдың еңселі ескерткіші ашылды.
Мемлекет басшысы бұл күнді қазақ пен қырғыздың рухани өміріндегі ерекше күн ретінде бағалап, Бішкек төрінде Абай ескерткішінің бой көтеруін қырғыз елінің қазақ халқына деген айрықша құрметінің белгісі деп атап өтті. Қасым-Жомарт Тоқаев осы игі бастамаға қолдау көрсеткені үшін Садыр Жапаровқа зор ризашылығын білдіріп, бұл қадам Алатаудың бөктерін қатар жайлаған екі елдің бауырластығын бекемдей түсетінін айтты.
«Ағайын елдердің тамырластығын кезінде Абай да айтқан. Ұлы ақын қазақтың тарихына тоқталған кезде қырғыз бауырларды ерекше атап өткен. Ол «Еш қазақ қырғыз бен қазақтың бір тұқымдас екеніне таласпайды» деген. Шын мәнінде, екі ұлттың тегі мен тілі бір, жүрегі мен тілегі бір. Айыр қалпақты ағайынға біздің ықыласымыз қашанда ерекше. Көп ұзамай елімізде Манас ескерткіші бой көтереді. Бұл есім қазақ арасында өте танымал. Әйгілі Манасқа құрметіміз ерекше. Манастану ғылымының негізін қалаған Шоқан Уәлиханов екенін еске салғым келеді. «Манас» жырының тағдыры тартысқа түскен кезде оған Мұхтар Әуезов араша түскенін білеміз», – деді Қазақстан Президенті.
Садыр Жапаров Абай ескерткіші ашылған күн қырғыз-қазақ үшін маңызды күн екенін атап өтті. «Философ, гуманист тұлға, қазақтың ұлы ақыны Абайға Бішкек қаласында қойылған ескерткіштің ашылуымен баршаңызды құттықтаймын. Екі елге ортақ тұлғаға дипломатиямыздың 30 жылдығы қарсаңында құрмет көрсетіліп отырғаны – ерекше оқиға. Жазда жайлауы, қыста қыстауы қоңсы қонған екі халықтың рухани әлемінің жақындығын Абай мен Тоқтоғұлдың, Мұхтар мен Шыңғыстың мұралары көрсетіп келеді. Абайдың 175 жылдығы кезінде Ұлттық кітапханадан арнайы мәдени бұрыш ашылғанын да еске салғым келеді. Біздің бауырлас қазақ халқымен достығымыз барлық салада дами беретініне сенемін», – деді Қырғызстан Президенті.
Мемлекет басшысы Қасым-Жомарт Тоқаев ескерткіштің ашылуына жиналған екі елдің зиялы қауым өкілдерімен кездесіп, пікір алмасты.
Қоладан құйылған ескерткіштің авторы – Қазақстан суретшілер одағының мүшесі Асқар Нартов.
Осы сапарында Қазақстан президенті әл-Фараби атындағы Қазақ ұлттық университеті филиалының ашылу рәсіміне қатысты. Әл-Фараби атындағы ҚазҰУ ректоры Жансейіт Түймебаев екі мемлекеттің басшыларына университет аудиторияларын көрсете жүріп, оқу ордасының білім беру және ғылыми жобалары, соның ішінде қырғыз студенттері үшін грант бөлу жоспары туралы айтты. Университетті аралап көру барысында президенттер жоғары оқу орнының оқытушы-профессорлар құрамымен және ҚазҰУ-дің қырғызстандық түлектерімен әңгімелесті.
«Қырғызстан – құдай қосқан көрші, ең жақын одақтас. Шын мәнінде, біз – ауылымыз аралас, қойымыз қоралас жатқан бауырлас халықпыз. Биыл дипломатиялық қарым-қатынас орнатқанымызға 30 жыл толып отыр. Осы уақытта ынтымағымыз барынша кеңіді, достығымыз нығая түсті», – деген Қасым-Жомарт Тоқаев осы сапар барысында екі ел үшін маңызды бірқатар мәселелердің түйінін тарқатып қайтты.
1176 рет
көрсетілді0
пікір