- Руханият
- 08 Қыркүйек, 2022
«АБАЙДЫҢ МӘРТЕБЕСІН КӨТЕРДІ»
Мәскеудегі қазақ диаспорасының өкілдері мен ресейлік жоғары оқу орындарында білім алып жатқан қазақстандықтар Қазақстанның РФ-дағы елшілігімен бірлесіп, көрнекті қазақ ағартушысы, ғалым, публицист, қоғам қайраткері, «Алаш» партиясының мүшесі Ахмет Байтұрсынұлының 150 жылдығына орай дөңгелек үстел өткізді.
Дөңгелек үстелдің шымылдығын ашқан әл-Фараби атындағы ҚазҰУ халықаралық қатынастар магистрі Бағдад Әлімханқызы Ахмет Байтұрсынұлы мұралары мен еңбектерін сақтаудың маңызын атап өтті.
«Оның баға жетпес құнды мұралары біздің жадымызда және жүрегімізде мәңгі сақталады. Бұл – тек міндет қана емес, сонымен қатар әрқайсымыз үшін жоғары құрмет. Бүгін біз тарихымызда терең із қалдырған көрнекті қайраткерлердің бірі Ахмет Байтұрсынұлының туғанына 150 жыл толуын атап өтудеміз», – деді Б.Әлімханқызы.
Ресей халық шаруашылығы және мемлекеттік қызмет академиясының доценті Талғат Мықтыбаев Ахмет Байтұрсынұлының педагогика, әдебиет және саяси қызметтің дамуына қосқан зор үлесін атап өтті.
«Бүгін біз қазақ әліпбиін жасаушының мұрасын жан-жақты қарастырдық, оның бірқатар шығармаларын оқыдық. Оның әдебиеттегі «Абайтану» деп аталатын бағыттың негізін қалаушы болғанын ұмытпауымыз керек. Ол алғашқылардың бірі болып Абайдың философ, ағартушы ретіндегі мәртебесін көтерді», – деп атап өтті ғалым.
Т.Мықтыбаев Ресейдегі қазақ диаспорасының өкілдері Байтұрсынұлын еске алуға арналған іс-шараларды тұрақты түрде өткізіп тұратынын айтты.
«Жақында біз қазақ ағартушысының ұрпақтарымен және жерлестерімен кездесіп, оның Ресейде болған кезеңін зерттеуге көмектестік. Сонымен қатар біз Ахмет Байтұрсынұлын еске алуға арналған шығармашылық кеш өткіздік, сондай-ақ оның ағартушылық идеяларын шетелде дәріптеуге тырысамыз», – деді ол.
Іс-шара барысында қатысушылар көрнекті ағартушының өмірбаянынан алынған қызықты деректермен бөлісті, оның өмірі мен қызметі туралы деректі фильмді тамашалады.
Сондай-ақ қазіргі қазақ тілінің, жазудың дамуындағы ағартушының рөлін және оның өз елінің саяси және мәдени өміріндегі ықпалын талқылады.
Өз тілшімізден
706 рет
көрсетілді0
пікір