• Ақпарат
• 11 Сәуір, 2024

Теңге ілуге де тер төгу керек

V Дүниежүзілік көшпелілер ойындарына дайындық аясында Шымкенттегі орталық ипподромда теңге ілуден II Азия Кубогі басталды. Байрақты бәсекеде Қазақстан, Қыр­ғызстан, Өзбекстан, Ресей, Қытай, Монғолия, Тәжікстаннан келген спортшылар теңге ілудің үш стилі бойынша бақ сынайды.

Сайыстың ашылу салтанатына Ұлттық спорт қауымдастығының президенті Исламбек Салжанов, Теңге ілу федерациясының президенті Амангелді Әбдіқадыров, Шымкент қаласы әкімінің орынбасары Сәрсен Құранбек және жанкүйерлер, мегаполистің тұрғындары мен қонақтары қатысты.
Ашылу салтанатында сөйлеген сөзінде  Ұлттық спорт қауымдастығының президенті Исламбек Салжанов Мемлекет басшысы Қасым-Жомарт Кемелұлы Тоқаевтың қолдауымен елімізде ұлттық спорт түрлері қарқынды дамып келе жатқанын атап өтті. 
– Биыл қыркүйек айында Астанада ҚР Президентінің бастамасымен V Дүниежүзілік көшпелілер ойындары өтеді. Бүгінгі Азия Кубогі – осы «Көшпелілер Олимпиадасы» алдындағы жауапты жарыстардың бірі. Теңге ілу спортының Дүниежүзілік көшпелілер ойындарының бағдарламасына енуі, оның әлемдік деңгейде танымал болуына ықпал етеді, – деді Исламбек Салжанов.  
Жарыс алдында Исламбек Салжанов Теңге ілуден Қазақстан ұлттық құрамасының мүшелерімен кездесіп, оларға алдағы сайыстарда сәттілік тіледі.
II Азия Кубогіне 7 елден келген спортшылар қатысып жатыр, бұл теңге ілу спортына деген қызығушылықтың артып келе жатқанын айғақтайды. Теңге ілу федерациясы Ұлттық спорт қауымдастығымен бірлесіп, осы ұлттық спорт түрін халықаралық деңгейде дамыту бойынша тұрақты негізде ауқымды жұмыс атқарып жатыр. Атап айтқанда, биыл Халықаралық теңге ілу федерациясын ашу көзделіп отыр.
Теңге ілу федерациясының президенті Амангелді Әбдіқадыровтың айтуынша, осы Азия Кубогіне еліміздің үздік спортшылары қатысып жатыр. 
«Бұл жарыста ұлттық құрамамыздың спортшылары V Дүниежүзілік көшпелілер ойындары қарсаңындағы өз дайындығын көрсетеді. Ал шетелдік құрамалар Қазақстанның үздік спортшыларымен тәжірибе алмасуға мүмкіндік алады», – деді федерация басшысы.
Өз кезегінде, Шымкент қаласы әкімінің орынбасары Сәрсен Құранбек мегаполисте ұлттық спортпен айналысу үшін барлық жағдай жасалғанын, атап айтқанда, 2023 жылы халық­аралық деңгейдегі жаңа ипподром салынғанын, онда ұлттық спорт түрлері бойынша ірі жарыс­тар өткізілетінін атап өтті.
Жарысты барынша әділ бағалау үшін осы жолы теңге ілу спортының тарихында тұңғыш рет бейне қайталау жүйесі қолданылады. Сонымен қатар уақытты есептеу үшін арнайы лазер секундомер пайдаланылады.