Шәкәрім Құдайбердіұлы. Сөз сынап, өлең өлшемен

Сөз жазамын түнімен
Бар ұйқымды қашырып,
Тығып қойман мұны мен
Еш адамнан жасырып.
Мен кетермін, сөз қалар,
Ақ қағазға басылып.
Бозбалалар қолға алар
Әр ауылға шашылып.
Оқырсың да қолға алып,
Сөздің мінін табарсың,
Өз сөзіңе өң салып,
Дауды жүндей сабарсың.
Болмасам да қасыңда,
Алды-артыңды қамарсың.
Миың бар ма басыңда,
Байқастамай шабарсың.
Білімді жұрттың ақыны
Біздің сөзді сынамас.
Жазушының жақыны
Қазақ мұны ұнамас.
Сынасарсың өзіңді,
Менің түгім құрамас.
Өлген кісі сөзімді
Сынама деп сұрамас.
Сынасын деп жазғамын,
Сынама деп жатпаймын.
Қазақтың мінін қазғамын,
Айтқанымнан қайтпаймын
Қазақ сыншыл болса екен,
Болмасын деп айтпаймын.
Жетегіме ерсе екен,
Өлсем де тыныш жатпаймын.
Мен жетелеп өлемін
Өрге қарай қазақты.
Өлсем де ойын бөлемін,
Сөзбен салып азапты.
Білімдінің сөзіндей
Сөзім демен таза, ақ-ты.
Қазақ болса өзімдей,
Қыла алмайды мазақты.
Қазақтың жайы белгілі,
Өлеңі өңкей құрама.
Байқадың ғой ендігі,
Оны менен сұрама.
«Аулым қонды Нұраға,
Мінген атым сұр ала».
Керексіз сөзбен бұрала,
Қазақ сөйтпей тұра ма?!
Сөзімді өлшеп қараңыз,
Уәзінге дәл шыға ма, –
Қазақ деген балаңыз
Уәзінді де ұға ма?!
Сөзді әнге дұрыстап,
Өлшеуменен сыға ма,
Сыймаса да сырықтап,
Зорлық қылып тыға ма?!

Оқи отырыңыз... Авторлық мақалалар

2 Пікір

  1. МАРАТ

    Абай, Шәкерім, Ахмет, Міржақыптар айтқан қазақтың бойындағы жағымсыз қылықтардың әліде бойымыздан көрініп қалатыны өкінішті-ақ.

  2. ҚУАНЫШ

    Өкінген -деген не сөз. Жылау керек.Қазақ -қазақ боп тұрғанша,ол жаман қылықтан арылмайды. Себебі біз-қазақтар жазмышта солай жаратылғанбыз! Абай,Шәкәрім соны біліп қапаланып , күйініп өмірден өтті! «Қазақтың тірісінде жақсысы жоқ,өлісінде — жаманы жоқ» -деген сөз тектен-тек айтылмаған!

Пікір қалдыру

Сіздің E-mail-ңыз жарияланбайды.