Қос ғасырдың куәгері

Тәуелсіздік мерекесі қарсаңында Құрманғазы ауданының әкімі Бибоз ­Шаяхметов Асан, Сүйіндік, Балқұдық ауылдық округтерінде болып, әлеуметтік нысандарды аралап, жағдайымен танысты. Сапарын Асан ауылдық округінен бастаған Бибоз Байдәулетұлы жасы жүзге келіп отырған  Уағиса Мұхтарқызынның  үйіне  арнайы ат басын бұрып, Тәуелсіздіктің 25 жылдық мерекесімен құттықтады.

Уағиса әжей майданға аттанған жарын өмір бойы күтіп, ошағының отын сөндірмей ұрпақтарын өзгелерден кем қылмай тәрбиелеп, ержеткізген ана. Отызыншы жылдардағы аштықтың, қым-қиғаш қиындықтарға толы соғыс заманының, одан бергі уақыттардың талай ауыртпалықтарын қабырғасы қайыспай көтерген қария әлі де тың. Көзі көрмесе де құлағы естиді. Есте сақтау қабілеті жақсы. Қолындағы келіні Раушан қонақтарды жылы ­шыраймен қарсы алды. Уағиса әжей күллі қазақ үшін ортақ қуаныш Тәуелсіздік тойы қарсаңында жол алыстығына қарамай арнайы келіп құттықтаған басшыларға лебізін білдірді.
– Үлкен ана деп елеп, жол қиындығына қарамай арнайы келген екенсіздер. Бәріңе де рақметімді айтамын. Аудан басшыларына ризамын, Жеңіс күндері соғыс жесірі деп құрметтеп, қолдарынан келген көмектерін аямауда. Бастарыңызға Алла Тағала бақ, ұзақ өмір, дендеріңе саулық берсін. Отбасыларыңдағы ұрпақтарыңнан жақсылық көріп, аман жүріңдер, айналайындар. Елдің елеулі, халықтың қалаулысы болыңдар. Ұлы Отан соғысы жылдарында талай азаматтар майданға кетіп оралмағанда артында жас­тай жесір атанған жұбайларының жылап-еңіреп қалғанына куәміз. Олар ерлерінің орынын жоқтатпай еңбек етті. Ұрпақтарымызға Алла Тағала соғыстың бетін көрсетпей, Тәуелсіз еліміз өркендесін. Елімізде амандық, тыныштық болғай, – деп ардақты ана Бибоз Шаяхметов пен Нұрлан Құсайыновқа арнап шығарған өлең жолдарын оқып, ризашылығын білдіріп, ақ батасын берді.
Аудан әкімі Бибоз Байдәулетұлы өз сөзінде: «Мақсатымыз ғасыр жасап отырған анамызды Тәуелсіздіктің 25 жылдығына орай құрметтеп, «Ғасыр анасы» аталымын ұрпақтарының алдында тапсырайық деген ниет. Қасыма ілескен кәсіпкер азаматтар – Нұрлан Құсайынов пен Мерғали Ғабдушев «Біз сол анамызға демеуші болайық. Құр қол бармайық» деп бізге қолдау көрсетіп, сыйлыққа үлкен мұздатқыш әкеліп отыр. Кәсіпкерлеріміздің елге осындай жақсылық жасағанын дұрыс деп білемін. Сондай-ақ бізбен бірге сізді құттықтауға аудандық Ардагерлер кеңесінің төрағасы, аудан әкімі аппаратының басшысы, жергілікті полицияның бастығы, округ әкімі, мектеп директоры, аудандық газеттің тілшісі және облыстық теледидар­дың операторы келді. Үлкен кісінің ­бабын тауып, осылай жағдайын жасап, бағып отырған келіні мен балаларына үлкен рақмет. Анамызға мықты денсаулық тілеп, сіздермен тек жақсылықтарда кездесейік дегім келеді» деді. Аудандық ардагерлер кеңесінің төрағасы Орынғали Құмарғалиев жүзге толғалы отырған анаға ақ тілегін жолдады. Соңында Уағиса әжейдің кеудесіне «Ғасыр анасы» деген жазуы бар көк лента тағылып, гүл шоғы ұсынылды.
Одан әрі аудан басшысы ауылдағы поштаға кіріп зейнетақы мен жалақының, несиенің уақытымен берілуін, мерзімдік басылымдарға жазылу барысын сұрады. Мерзімдік басылымдарға жазылу мұнда қазіргі күні 70 пайызға орындалыпты. ­Бауыржан Момышұлы атындағы мектеп алдында оқушылармен кездесіп, жағдайларын білді. Сырты да, іші де көз тартатын білім ұясының директоры Құралай Илиясовамен бірге мектеп ішін аралады. 22 ұстазы бар мектепте дайындық сыныптарын қосқанда 130 бала білім алады. Асханаға кіріп оқушыларға берілетін тамақ мәзірін қарады. Құралайға мектептің тазалығын, жағдайын облыс басшысы келгенде мақтап, жұмысына қатты риза болып кеткенін жеткізді. Асан ауылындағы дүкендерге кіріп халық тұтынатын маңызды азық-түлік тауарларының бағаларын көзбен көрді. Аудан әкімі оны Ганюшкин ауылындағы бағамен салыстырып, кәсіпкерлерге азық-түлік құнын мүмкіндігінше көтермеу, халыққа қиындық туғызбау керектігін айтты.

Қанат ҒҰМАРОВ
Атырау облысы

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.