«Мәдениет пен әдебиет елді елдестіреді»

Қазақстан мен Түркия дипломатиялық қарым-қатынастың 25 жылдығы аясында қоғамдық сананы жаңғырту бағдарламасын іске асыру мақсатында Қазақстанның Анкарадағы елшілігінде «Қазақстанның рухани жаңғыруындағы Қожа Ахмет Ясауи» атты конференция өтті.

Конференцияға Қазақстан­ның Түркиядағы елшісі Абзал Сапарбекұлы, Қожа Ахмет Ясауи атындағы халықаралық қазақ-түрік уни­верситеті Өкілетті кеңесінің төрағасы Мұса Йылдыз, Түркі мә­дение­тін дамыту ұйымының бас хатшы орынбасары Фырат Пурташ, Еуразия Жазушылар қауымдас­тығының төрағасы Якуб Омароғлы, жазушы Алпер Қаған Үчер, түрік зиялы қауым өкілдері және Түркияда қоныстанған Қазақ­станның азаматтары қатысты.
Шара барысында жазушы Алпер Қаған Үчердің бүкіл түркі дүниесінің пірі, ұлағатты ұстазы Қожа Ахмет Ясауи туралы жазылған Sarp Yokuş (Тік өр) атты романының тұсауы кесілді. Конференцияны құттықтау сөзімен ашқан елші А.Сапарбекұлы Қазақстан Республикасының Президенті Н.Ә.Назарбаевтың «Болашаққа бағдар: рухани жаңғыру» бағдарламалық мақаласындағы негізгі бағыттарын атап өтіп, Қазақ елінде жасақталып отырған рухани және мәдени географиялық белдеу туралы, латын әліппесіне көшу туралы Жарлыққа Елбасының қол қойғандығы және былтырғы жылы ЮНЕСКО тарапынан жария етілген «Ясауи жылы» аясында бірқатар маңызды іс-шаралардың ұйымдастырылғандығы жөнінде хабарлады. Сонымен қатар, әдебиетте «Шынар ата» атанған түрік жазушысы А.Қ.Үчерді Ясауи бабамыз туралы жазған жаңа шығармасымен құттықтап, ақ жол тіледі.

«Мәдениет пен әдебиет елді елдестіреді»

Өз кезегінде жазушы А.Қ.Үчер Елбасы Н.Назарбаевтың қоғамдық сананы жаңғырту бойынша ұстанған салиқалы саясатын жоғары бағалап, түркіден шыққан Қожа Ахмет Ясауи сынды ұлы тұлғалардан қалған рухани мұраға ие болып отыру қажет екендігін және сол мұралардың ғана қазіргі таңда қауіп төндірген радикалды ағымдарға қарсы төтеп бере алатындығын жеткізді. Түрік жазушысы сөз соңында Елшіліктің мәдени-гуманитарлық сала бойынша белсенділікпен атқарып отырған шараларды атап өтіп, екі бауырлас ел арасындағы қарым-қатынастың жоғары деңгейде дамып отырғандығын айтты. «Мәдениет пен әдебиет елді елдестіреді, жұртты жақындастырады. Қазақ елінің тәуелсіздік жылдарында қол жеткізген жетістіктері көп. Бүгін де рухани жаңғыру бағдарламасы аясында өзінің ұлттық құндылықтарын Анадолу жерінде көрсетіп отыр. Менің еңбегім екі ел арасында көпір болса арманым орындалды деп есептеймін» деді түрік қаламгері.
Шара соңында Елші А.Сапар­бекұлы түрік жазушысы А.Қ.Үчерді алғыс хатпен марапаттады.

Б.Мұратқызы

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.