Сахна саңлағы

Б.Римова атындағы Алматы облыстық драма театрында Қазақстанның халық артисі, Мемлекеттік сыйлықтың лауреаты Бикен Римованың туға­нына 95 жыл толуына орай баспасөз мәслихаты және «Сахна саңлағы – Бикен Римова» атты еске алу кеші өтті. 

Бикен Римова 1923 жылы Қаратал ауданы қазіргі Қанабек ауылында дүниеге келген. Әкесі мен анасынан жастай айырылып, тағдыр тауқыметін көп тартқан. Қаршадайынан өнерге ынтық болған ол арман қуып Алматыға аттанады. Алғашында Алматы есеп-кредит техникумының «Экономика факультетіне» оқуға түсіп, кейін театр-көркемсурет училищесіне ауысады. Білім ала жүріп, «Абай» қойылымында көпшілік сахнада өнер көрсетеді. Бұл талантты тұлғаның театр әлеміндегі алғашқы қадамы болатын. Қазақтың тұңғыш кәсіби режиссері, педагог-профессор Асқар Тоқпанов үшінші курс студенті Бикенге «Еңлік-Кебек» пьесасындағы Еңлік рөлін ұсынады. Осылайша алғашқы қадамы сәтті басталып, драма театрына жұмысқа қабылданады. 60 жылға жуық өмірін өнерге арнаған талантты актриса театр сахнасында 80-ге жуық рөлді сомдаған. Сонымен қатар ол әдебиет әлемінде де өзіндік қолтаңбасын қалдырды.
«Еңлікгүлім», «Өнердегі өнегелі өмірлер» атты қос кітаптың авторы. Әйгілі қазақ актерлерінің шығармашылығы жайында қалам тербеген мақалалары баспасөзде жария­ланған. Б.Римова – «Абай-Әйгерім», «Қос мұңлық» сынды пьеса­ларды дүниеге әкелген драматург, ұлттық сахна өнерінің кемелденуіне сүбелі үлес қосқан тұлға. Талдықорған қаласында 1975 жылы шаңырақ көтерген театрға 2000 жылы Қазақстанның халық артисі Бикен Римованың есімі берілді. Жиынға Алматы облысы Мәдениет, архивтер және құжаттама басқар­ма­сы­ның басшысы А.Әбдуалиев, Б.Римова атындағы Талдықорған драма театры­ның директоры Ғ.Темірбаева, облыстық «Жетісу» газетінің бас редакторы Ә.Әрін, Қазақстанның халық артисі А.Кенжебекова қатысты. Шараны ұйымдастырудағы мақсат – Бикен Римованың есімін, шығармашылығын жас ұрпақтың санасына сіңіру, рухына тағзым ету. Кешті жүргізген Ж.Әміреев қазақ сахнасына Еңлік боп шығып, Естайдың Қорланы болып қоштасқан Бикен Римованың өмірі мен өнер жолына тоқталып өтті.
«Халқымыздың мақтанышына айналған Бикен апамыз да қазақ театрының іргетасын қалаған кешегі Қ.Қуанышбаев, С.Қожамқұловтар секілді туа бітті талант болатын. Қазақтың бүкіл болмысын, қалпын бойына сіңіріп, сол арқылы өнерге келген. Бикен апа неге ұлы актриса болды? Өйткені ол ең әуелі жақсы адам болатын. Адамның табиғаты таза болмайынша, одан таза өнер шықпайды» деп жазушы Әміре Әрін естеліктерімен бөлісті.
Мәдениет басқармасының басшысы Ақан Жылқышыбайұлы актриса мерейтойының осы жиынмен шектеліп қалмайтынын жеткізді. Алда келе жатқан театр күнін, екі жылда бір рет өтетін Орта Азия театр фестивалін Б.Римованың есімімен байланыстыру қажет екендігін айтты.
Кеш «Қос мұңлық» қойылымымен жалғасты.

Назерке ӘДІЛБЕКОВА

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.