Талдықорған театрына жаңа ғимарат берілді

Талдықорғанда Бикен Римова атындағы драма театрға жаңа заманауи ғимарат пайдалануға берілді. 7-ықшам ауданында бой көтерген екі қабаттан тұратын ғимараттың жалпы ауданы 10 538 шаршы метр. Көрермен орны 510 адамға лайықталған. Жаңа театрдың шымылдығы шаңыраққа қоныстанған өнер иелері қазақ классикасының жауһары – Мұхтар Әуезовтың «Айман-Шолпан» комедиясымен ашылды.

Театр ғимаратының ашылуы Орта Азия елдерінің ХVII халықаралық театр фестивалімен тұспа-тұс келді. «Бұл фестивальге Башқұртстан, Түркия, Түркіменстан, Қырғызстан, Өзбекстан мемлекеттерінен театр ұжым­дары және КСРО халық артисі, Мемлекеттік сыйлықтың лауреаты, Қазақстан театрлары ассоциациясының төрағасы Асанәлі Әшімов бастаған қазылар алқасы қатысып отыр. Сонымен қатар аталмыш өнер додасы көрнекті мемлекет және қоғам қайраткері Темірбек Жүргеновтің 120 жылдығына арналып отырғаны да ұрпақ сабақтастығы деп есептеймін» деді Алматы облысының әкімі Амандық Баталов құттықтау сөзінде.
Осы орайда айта кетейік, Аста­на­ның 20 жылдығы мен көрнекті мемлекет қайраткері Темірбек Жүргеновтің 120 жылдығына арнал­ған VII Орталық Азия елдерінің халықаралық фестивалі өтуде. Аталмыш ауқым­ды шараны Мәдениет және спорт министр­лігінің қолдауымен Қазақ­стан Театрлары ассоциациясы ұйым­дас­тырған. Мақсаты – Орталық Азия елдері мен Қазақстанның театр өнері саласындағы әріптестікті нығайту, театр өнерін дамыту және осы сала мамандарын шығармашылық бастамаларға ынталандыру, сондай-ақ жұрт­шылықтың назарын театр үрдісінің жаңа, заманауи үлгілеріне аудару.
Фестивальге Қазақстан, Қырғыз­стан,Түркіменстан, Башқұртстан, Өзбекстан, Түркия елдерінің театр­лары қатысады. Фестиваль аясында 11 қойылым ұсынылса, алдымен Б.Римова атындағы Талдықорған драма театры «Айман-Шолпанды» қойса, «Дариға-ай» жастар театры «Ричард III» қойылымын ұсынды.
Айта кетейік, «Театр – 28» ұжымы «Войцек» қойылымын, Алп Арслан атындағы Түркімен Ұлттық жастар театры «Көроғлы және Агаю­­нусты», ресейлік М.Гафури атын­дағы Башқұрт мемлекеттік ака­демиялық драма театры «Іздеп таптым сені…» қойылымын тарту етеді. Түркия республикасынан келген Хасан Ажар өндірістік театрының ұжымы «Пирайе» атты пьесаны көпшілікке ұсынса, Б.Қыдыкеева атындағы Қырғыз Мемлекеттік жас­өспірімдер театрының актерлері «Қасқыр ұлыған түнді» сахналайды. Өзбекстанның Сырдария облыстық музыкалық драма театры «Ана – Жер – Ана» қойылымын, Н.Бекежанов атындағы Қызылорда облыстық қазақ музыкалық драма театры ұжымы «Нарком Жүргеновты» ұсынатын болады.
Сонымен қатар С.Мұқанов атын­дағы Солтүстік Қазақстан облыс­тық Қазақ музыкалық драма театры «Қара­гөзді», елордалық Қ.Қуаныш­баев атындағы Мемлекеттік академия­лық қазақ музыкалық драма театры «Қорғансыздың күнін» сахналайды.

Бота ҚУАТ

Оқи отырыңыз... Авторлық мақалалар

Пікір қалдыру

Сіздің E-mail-ңыз жарияланбайды.