- Әдебиет
- 21 Ақпан, 2013
Азамат. Ұстаз. Ғалым
...1947 жыл. Сәкең сол қолының саусағына күбірткелі шығып, істемеген емі, жақпаған дәрісі қалмайды. Алайда саусағы солқылдатып, жанына әбден батады. Марқұм әкесі Аймағанбетов Садық шыдай алмаған баласын аудан орталығы Жарқамыстағы емханаға көрсетеді. Сәкеңнің бағына емханада қырқыншы жылдары саяси көзқарасы үшін Пермь қаласынан жер аударылған профессор Здравомыслов дейтін ғалым-дәрігер қызмет етеді екен. Профессор көрген бетте кеселдің асқынып кету қаупінен сақтанып, алдын ала ем-доммен бірге шұғыл түрде ота жасауды ұйғарады. Бәлкім, оның болашақта дәрігерлік мамандықты таңдауына сірә, өміріндегі осы сәттің ерекше әсері болғаны шүбәсіз.
«Талапты ерге нұр жауар» демекші, емтиханның бәрінен өте жақсы бағаға тапсырған ол Ақтөбедегі мемлекеттік медицина институтының студенті атанады. Әлбетте, оқу өте қиынға соқты. Себебі күллі оқу жүйесі мен бағдарламасы орыс тілінде жүргендіктен бастапқыда ештеңені ұқпай, берілген тапсырманы күні-түні құр жаттап айтуға мәжбүр болады. Шындығы сол – елге кері қайтуға ар-намыс жібермейді, бірінші, екінші курста орыс тілінен әбден қиналады. Дегенмен, үшінші курстан былай білуге құштар студент тынымсыз еңбекқорлық пен ұдайы ізденістің нәтижесінде орыс тілін терең игеріп, дәрістің мән-мағынасы мен іс жүзіндегі тәжірибелік парқын пайымдауға ден қоятын сана деңгейіне жетеді. Алдына мақсат қоя білу мен сол үдеден абыроймен шығу – асқан табандылық пен зор ерік-жігерді талап етеді. Қазақы қисындағанда «Өзгені жеңе білу – қасиет, өзіңді жеңе білу – құдірет». Міне, оның қанында бар, бойына біткен осы мінезі қандай қиындықпен болсын күресуге әманда дайын құдіретті күш берді. Сөйтіп, Садықов Сайын аталған жоғары оқу орнының емдеу факультетін 1968 жылы ойдағыдай тәмамдайды.
Жас маманның алдында қиындығы мен қызығы мол еңбек жолына араласудың, қоғамның салауаттылық мәдениетіне өз үлесін тигізуге мүмкіндігі туды. Ол бар оқыған-тоқығанын тағдыр тәлкегімен сырқатқа ұшыраған отандастарының сауығып кетуіне, дертіне шипа үміт сәулесін түсіруге қажыр-қайраты мен кәсіби ақыл-парасатын аянбай жұмсады. Дәрігер 1970 жылға дейін Ақтөбе облысы, Хромтау қаласында хирургия бөлімшесінің меңгерушісі болып жемісті қызмет етеді. Осы жылдары өңірдегі адам денсаулығының өзекті мәселелерімен етене жақын танысқан сайын оның көзқарасы түбегейлі өзгеріп, ем-домның ғылыми-технологиялық тиімді жаңа түрлерін тәжірибеде батыл енгізу мен қолданудың заман талабына сай аса ділгірлігін сезеді. «Шешінген судан тайынбас» деген ол енді осы діттеген жоспарын жүзеге асыру мақсатымен бар қабілет-қарымын бірыңғай зерттеу жұмыстарымен айналысуға тәуекел етіп, белін бекем буады. Дәл сол жылы ғалым қарашаның 15-де Қазақтың онкология және радиология ғылыми-зерттеу институтының кіші ғылыми қызметкері, 1987 жылы клиникалық радиологияның аға ғылыми қызметкері міндетін атқарады. 1996–1999 жылдар аралығында оған осы бөлімшенің меңгерушісі болуға сенім артады. Садықов Сайын қатерлі ісік ауруларын сәулемен емдеу бағытындағы ғылыми-зерттеу жұмыстарымен айналысып, ісіктің ионданған сәулелерге сезімталдығын жоғарылатуға бағыттаған. Медицина саласындағы көп жылғы көз майын тауысқан жаңалық тұжырымын ғалым 1991 жылы Мәскеудің оқымыстылары алдында «Өкпенің қатерлі ісігін сәулемен емдеуде дозаларды әртүрлі тәсілмен бөлшектеудің салыстырмалы нәтижелері» деген тақырыпта кандидаттық диссертация қорғады. Бұл емдеу тәсілінің нәтижесінде өкпе, өңеш, жатыр, жұтқыншақтың қатерлі ісіктерімен ауырған науқастардың өмір сүру сапасы жақсарды. Зерттеуші-ғалым 1991 жылдан Қазақтың медициналық ұлттық университетінде әуелі ассистент, сосын доцент, 1999 жылы онкология, маммология және сәулелік терапия кафедрасының доценті ретінде өзіне жүктелген ғылыми-ұстаздық мәртебелі жауапкершілікті қатар алып жүреді. Ғалым-ұстазға 2003 жылы ЖАК-тың доценттік дипломы, 2008 жылы сәуірдің 15-де ҚазҰМУ-дың ғылыми кеңесінің шешімі бойынша академиялық профессор атағы берілді. Садықов Сайын ұзақ жылғы ұстаздық, ғылыми шығармашылық ізденістерінің нәтижесінде бірнеше монография мен оқулықтар, студенттер мен оқытушыларға арналған бірнеше оқу-әдістемелік еңбектер жазып, сәулелік терапияның барлық тарауларына қайтадан өзгеріс енгізіп, қазақ тілінде толықтырып бастырды. Профессор Қазақтың медициналық ұлттық университетінің барлық факультеттеріне, интерндерге арналып ситуациялық есептер, тестілер құрастырды.
Онкология кафедрасының негізгі бір базасы – Қазақтың онкология және радиологиялық ғылыми-зерттеу институты. Садықов Сайын осы институттың радиология бөлімшесінде 42 жыл бойы сәулемен емдеу проблемасымен шұғылданатын мамандардың бірі болып саналады. Профессор бүгінгі таңда еліміздегі инновациялық технологияны қатерлі ісіктерді емдеуге қолдана білетін бірден-бір жоғарғы кәсіби маман.
Ұстаздық пен ғылыми шығармашылықты құстың қанатындай қатар алып жүрген айтулы тұлға 188-ден астам елеулі еңбектің авторы. Солардың ішінде 10 монография, 3 тиімді ұсыныс, 1авторлық куәлік бар.
Бір ғажабы, осы оқулықтар мен монографиялық еңбектердің біріне де мемлекет тарапынан қолдау жасалмай ғалымның жеке қаржысына баспадан жарық көргендігін айта кету лазым. Күллі саналы өмірін медицина ғылымының өркендеуі мен дамуына арнаған, осы салада буын-буын шәкірт баулыған ұлағатты ұстаздың бұл еңбектері ұлт қазынасын рухани байытуға қосылатын өшпес мұра.
Профессор Сайын Садықовпен дидарласып, ғылыми ізденістерінің мәні мен үлгі тұтқан ұстаздары туралы пікірін бөлісуді өтіндік.
«Радиология дейтін бұрын-соңды қазақта ғылым болмаған. Бұл өзі бірнеше ғылымның қосындысынан, атап айтқанда: медицина, ядролық физика, радиология, биологиядан тұрады. Аталған ғылымның Қазақстанда негізін салушы академик С.Балмұқанов ағамыз. Сол кісі 1945 жылдан бергі Қазақстандағы атомдық сынақтарды тексеріп, оның қоршаған ортаға, адам мен жануарлар ағзасына тигізген зиянын, әсерін, қанша доза мөлшерінде екенін анықтап, қай уақытта қандай ауру түрлері болуы мүмкін деген сұрақтарды ғылыми дәйекті түйін жасады. Жалпы, осының пайдасы мен зиянды жақтарын анықтап, ғылыми дәлелдеп берді.
Ісік ауруы түрлі-түрлі болып бөлінеді. Әрқайсысының өзіне тән ерекшеліктері болады. Қазақтың онкология және радиология институты тұңғыш рет осы ісік ауруының себеп-салдарын зертханалық тәжірибелер арқылы ғылыми зерттеумен шұғылданып келеді. Академик С.Балмұқанов, Ж.Әбдірахмановтың осы салада шетел ғалымдарымен бірлесіп елеулі-елеулі еңбектер жасады. Қазақ ғылымының әлгі әйгілі тұлғаларының жетегімен біздер шетелдік, атап айтқанда, Италия, Англия, Швецария, Германия, Чехословакия, Австрия, Нидерландия, Грекия ғалымдарымен бірлесіп зерттеу жүргіздік. Тұңғыш осы институт қабырғасында бұрынғы Кеңес Одағы бойынша эксперименттік тәжірибелер жасалды. Содан кейін бұл басқа жерлерде жасала бастады. Қазақтың онкология және радиология зерттеу институты әлемдегі басқа ғылыми орталықтармен салыстырғанда сәулемен емдеудің уақыт пен кеңістік аралығында таратуды айтарлықтай нәтижеге жетті. Өкініштісі, бұл өткен ғасырдың 90-жылдарына дейін зор қарқынмен жүрді. Кейінгі жылдары мемлекет тарапынан қаржыландыру тоқтап қалды. Сөйтіп, институттың радиология саласы мүлдем құлап қалды».
Білікті ғалым тұрақты түрде Қазақтың онкология және радиологиялық ғылыми зерттеу институтының ғылыми және клиникалық конференцияларына, 2010 жылы 1-4 қыркүйектегі Душанбе қаласындағы онкологтар мен радиологтардың IV съезіне, 11-13 қараша 2010 жылы Қазақстанның онкология және радиология институтының 50 жылдығына арналған мәжіліске, 2012 жылы қыркүйекте Астана қаласында өткен онкологтар мен радиологтардың VII съезі сияқты мәртебелі жиындарға қатысып, келелі мәселелерге ғылыми зияткерлік ортаның назарын аударды. Профессор Сайын Садықовтың ұстаздық, ғылыми-шығармашылық көп жылғы еңбегі мемлекет тарапынан бірнеше мәрте медальдармен, «Құрмет грамоталарымен» марапатталды. Ол – Қазақстан Республикасы денсаулық сақтау ісінің үздігі.
Сәкеңнің жұбайы Валентина Омарғалиқызы медициналық колледждің физиология пәнінің оқытушысы, қызы Венера Тұрар Рысқұлов атындағы университетте доктурантурада, ұлы Мағжан ҚазҰМУ сәулелі диагностика кафедрасының доценті, медицина ғылымдарының кандидаты және ҚазҰМУ онкология және радиология кафедрасының ғылыми қызметкері. Сәкең төрт немере, бір шөбере сүйген аяулы ата.
Талант көп қырлы болады деген рас. Абзал азамат Сайын Садықов қолы қалт еткенде қазақтың салт-дәстүрі, ән-күйі, шежіресіне де шама-шарқынша үлесін қосып жүр. Ел ішінде Сайынның сөзіне жазылған сазды ән әуені де кездесіп қалады. Шойыннан құйылғандай ірі денелі, жауырыны қақпақтай Сәкең студенттік өмірде күреске түсіп, белдескенін жеңген балуан. Ол 1966 жылы Ашхабад қаласына бір айлық әскери жиынға шақырылады. Осы жолы Орта Азия мен Қазақстанның студенттері арасында күрестен жарыс өтеді. Ақтық шешуші айқаста 80 келі. салмақ дәрежесіндегі Сәкеңнің қарсыласы 120 келі. тартатын Әзірбайжанның жеңімпазымен белдесуге шығады. Қазақстанның намысын қорғаған Сәкең төреші ысқырығы естілісімен қас қағым сәтте әзірбайжандық түйе балуанды алып ұрып, жауырынын жер иіскетеді. Сөйтіп, жарыс жеңімпазы атанып, спорт шебері атағын иеленеді. Белгілі ақын Есенбай Дүйсенбаевтың:
«...Балқытам деп тасты да,
Мен жүргенде тіл безеп,
Белдескенді астыңа
Алып ұрып бір кезек.
Бақыт отын маздатар
Бастан кештің сапар-күн:
Айхановпен қаз-қатар
Қара балуан атандың!..» деп жырға қосуы осы оқиғаға байланысты болса керек.
Дала да, қала да ақ көрпесін жамылған ақпан айының ішінде аңқылдаған азамат, ұстаз, ғалым Сайын Садықов мерейлі 70 жасқа шығып отыр. Сәкеңнің ғылыми-шығармашылық алар асуы әлі алда деп білеміз.
Аманқос МЕКТЕП-ТЕГІ
4073 рет
көрсетілді40
пікір