- Әдебиет
- 21 Ақпан, 2013
Күтемін мен алдымнан нұрлы сәтті
Өмір жүйрік...
Өзім күліп, өмір жайнап тұрғанмен,
Әрбір күннен күтем істі үлкен мен!
Жүрегімде бір сұрақ тұр салмақты,
Сол сұраққа жауап іздеп жүрмін мен!
Досым да көп, жолдас та көп жанымда,
Ал мен жалғыз, сұрақтардың жанында.
Ұғар жан жоқ, жан дүнием жылайды,
Қоршап сұрақ жан алқымнан алуда.
Бітпей жатқан қаншама іс тұр күтіп,
Бітірем бе, күш жетер ме, сол күдік?
Әрбір күннен күтем істі салмақты,
Жүйрік күндер зымырауда бір күндік.
Дос пен дұшпан
Досымнан дұшпан артық білем кейде,
Мінімді айтар тізіп, жайып елге!
Дұшпаным болмаса егер менде осындай,
Кетермін пісіп-кеуіп, қағып кеуде.
Сын айтар дұшпаным көп білем менде,
Шашымдай қарап жүрем, санап күнде.
Өңіме шашым қандай көрік берсе,
Дұшпаным көмектесер, сүрінбеуге.
Ұрпағымын Ер Есет
Жалаңаш қолы шоқпардай,
Дуалы сөзі шоқтардай.
Ұрпағымын ер Есет,
Айтылған сөзім оқтардай.
Қара сөзім қанжардай,
Таусылмас қалың ормандай.
Тілім үшін шетте мен,
Қытайдағы қорғандай.
Майыспас белі нарлардай,
Ерімес мұзы таулардай.
Тілімді шетте қорғармын,
Кеудемде шыбын жан барда-ай.
Жүрсем де елде еленбей,
Болсам да нәзік гүлдердей.
Ұрпаққа елден шет жүрген,
Үйретем тілді ерінбей.
Екі аяғы Батысты,
Тіреген Есет бабамдай,
Қазақтың тілін қалдырам,
Ордасында орыстың,
Алынбас биік қамалдай.
Сүрінбесін Тілім менің
Тілім де, тілегім де болсын мықты,
Күтемін мен алдымнан нұрлы сәтті.
Тілім мәңгі қалса деп тілеп жүрмін,
Мына өмірде қамшыдай қысқа сапты!
Тіліммен мен халық, ел саналармын,
Өсиетін үлгі еттім даналардың.
Бас кеспек болса да, тіл кеспек жоқ,
Осыны айтқан екен бабаларым.
Тілім жетпес, қалмасын түкпірлерім,
Тілім өткір қылыштай, текті тегім.
Сүрінсе де аяғым, тілегім сол,
Сүрінбесін ешқашан тілім менің.
Әйел деген бір әлем
Әйел деген бiр әлем,
Келiс мейлi, келiспе.
Әр отаудың Күнi ол,
Орбитасы ерекше.
Әр ошақтың жылуы,
Бақыты мен бағыты.
Әр жiгiттiң жартысы,
Таңдап алған сұлуы.
Әйел деген бiр әлем,
Ай да, Күн де бiр өзi.
Түнi де оның жап-жарық,
Өміріңнің өзегі.
Жарқын Өтешова
Мәскеу
4174 рет
көрсетілді0
пікір