• Білім және ғылым
• 03 Сәуір, 2009

«ҚазҰУ қалашығы – көзімнің қарашығы...»

Өткен сенбі күні әл-Фараби атындағы Қазақ Ұлттық Университетінде қарашаңырақтың 75 жылдығына арналған «Студенттік көктем» көркемөнерпаздар байқауының гала-концерті өтті. «Студенттік көктем» фестивалі – университеттің барлық факультеттері мен колледж студенттері қатысатын кең ауқымды шығармашылық жоба ғана емес, студенттердің әсерлі, ұмытылмас мерекелерінің бірі. 28 бағыт бойынша жобаға қатысушы 2000-нан астам сайыскерлер екі айға жуық бақ сынасқан. Сайыстың 3 кезеңі бойынша іріктеліп алынған студенттер классикалық, халық, эстрада әндерін орындау және би билеу мен авторлық сазды шығармалар, студенттік бейнесюжеттер, фотосуреттер, пародия, цирк қойылымдары және ұлттық аспаптарда ойнауда өнер көрсетті. Әсіресе, ұлты кәріс, халықаралық қатынастар факультетінің студенті Александр Цойдың Үкілі Ыбырайдың «Гәккуін» әуелете шырқауы көрерменге ерекше әсер сыйласа, химия факультеті студенттерінің киім үлгілері кәсіби дизайнерлердің қолынан шыққандай сәнді де сапалы көрінді. Бұл сында ҚазҰУ-дей «қара шалдың» сүт кенжесіндей болған колледж басқа факультетттерден оқ бойы озық келді. Одан бөлек жүлделі екінші орынды халықаралық қатынастар фаультеті, ал үшінші орынды биология мен экономика және бизнес факультеттері өзара бөлісті. Өнерде топ жарған жеңімпаздарды ҚазҰУ ректоры Бақытжан Тұрсынұлы Жұмағұлов құттықтап, арнайы диплом мен сыйлықтар табыс етті. Бұл әдемі де әсерлі кеш талай жанның жастығын «ұрлаған» ҚазҰУ-де мәңгі көктем екенін дәлелдей түскендей болды. Өкініштісі сол, ҚазҰҰ қабырғасында осыдан бір-екі жыл бұрын ғана тұсауын кескен «Адаспаңдар», «Бағдаршам» атты қанатқақты қойылымдарымен-ақ көрермендердің ыстық ықыласына бөленіп, республикалық басылымдардарда аға буынның батасы мен бағасын алған «Біз» жастар театрын да, оның әртістерін де бұл байқаудың жеңімпаздары арасынан көре алмадық.