- Ақпарат
- 16 Тамыз, 2012
БОКС БАҺАДҮРІ
Иә, біз солай дегенбіз. Олимпиадашыларымыз дүбірлі додаға аттанып жатқанда «Иә, сәт! Қажымұқан бабамыздың аруағы қолдасын!» деп жүрекжарды тілегімізді айтқанбыз. Алла тағала ниетімізді қабыл етті. Біздің спортшыларымыз ел мерейін асырды. Қазақ елінің көк байрағы Лондон аспанында сан мәрте желбіреді. Алтыншы алтынды қанжығамызға бөктеріп, асып-тасып тұрғанымызда, «Шіркін-ай, жетіншісін де жетектеп кетер ме еді» деп бұл «несібемізден» де қатты дәмелендік. 7 саны қазақ үшін қасиетті саналатын. Қазақтың бағы бар екен. Бұл тілекті де Жаратқан қабыл етті. Боксшы Серік Сәпиевке – мың мәрте алғыс. Бокс өнерінің нағыз баһадүрі екен. Қарсыластарынан мерейі үстем болып, Олимпиаданың алтын медалін иеленді. Спортшыларымызға дүйім елмен бірге Елбасы Н.Назарбаев та зор сенім артқан еді. Үлкен жолға шығар алдында үміткерлерімізді өзі қабылдап, иықтарына ауыр жүк артқан. Ол жүк – ел сенімі. Ақырында Елдің де, Елбасының да сенімі ақталды. Мемлекет басшысы әр спортшы жүлделі орынға ие болған сайын, өзінің жүректен шыққан құттықтауын жолдап отырды. Енді ертең, яғни 17 тамызда Елбасының қатысуымен жүйріктерді, ұлттық құраманы салтанатты ұлықтау рәсімі өтпек. Жеңімпаздар мемлекеттік наградалармен марапатталмақ. Оларды Елбасының өзі табыстайтын болады.
3068 рет
көрсетілді1
пікір