- Ақпарат
- 20 Мамыр, 2010
Түркияда келінді тәрбиелеу курстары бар
16 мамырда «Анкара» қонақүйінде KATEV білім қорына қарасты «Шаһлан» түрік бастауыш мектебінің ұйытқы болуымен түрік қолөнерінің жәрмеңкесі өтті. 2000 жылдан бастап дәстүрлі түрде ұйымдастырылатын шарада Қазақстандағы түрік әйелдері жасаған сыйлық заттар, тұрмыстық бұйымдар, Түркиядан әкелінген өнімдер көпшілік назарына ұсынылды.1994 жылы ашылған «Шаһлан» мектебінде Қазақстанда қызмет етіп жатқан түрік азаматтарының балалары білім алуда. Егер бұл жәрмеңкеден түсетін қаржының жоғарыда аталған мектеп қорына құйылатынын ескерсек, Анадолы халқының ұрпақ тәрбиесіне қаншалықты мән беретіндігін аңғаруға болады. Әрі бұл базардағы өнімдердің басым бөлігі – түрік әйелдерінің қолынан шыққан бұйымдар. Сондықтан үй шаруасындағы түрік қыз-келіншектері 6 айда бір рет қолөнер жәрмеңкесін өткізеді. Бұған 2 айда бір рет түрік тағамдарының көпшілікке ұсынылатынын қоссаңыз, қазақ келіндеріне де үлгі болар жайт екені даусыз. «DA. Қазақстан» журналының редакторы Мәлік Отарбаевтың айтуынша, Түркияда «Келін тәрбиелеу» орталықтары бар екен. Бұл мекемелер кей облыстарда мемлекет тарапынан қаржыландырылатын көрінеді. Тіпті қоғамдық ұйымдар да осындай курстардың ақылы бөлімдерін ашып, отанасы болған қыз-келіншектерге тамақ пісіруді, тоқуды, киім тігуді үйретеді екен. Қазақстандағы түрік ағайындардың жұбайлары арнайы Түркияға барып, қолөнер бұйымдарын жасауды үйреніп, елімізге келген соң көрген-түйгендерін осылай көпшіліктің назарына ұсынып әрі ақша тауып, қаражатты ұрпақтың сапалы білім алуына жұмсайды. Байқасаңыз, сөрелерде түрлі ыдыс-аяқтан бастап, көрпе-жастыққа дейін орын алған. Мұндағы кестелі сүлгілер де сұранысқа ие. Қыз-келіншектердің бір тобы орамалдардың саудасын қыздырып тұр. Олардың қайсысы болмасын үстеріне ұзын көйлек, бастарына орамал тағыпты. Қайырымдылық көрсетуді басты назарға алған аталған жәрмеңке жарнаманы қажетсініп отырған жоқ. Олардың негізгі мақсаты – жоғарыда атап өткендей, ұрпақтың білімі мен отанасының білігін арттыру. Ендеше, түрік халқының бұл игі ісін ұлттық қолөнерді дамытуда пайдалансақ, бастама баршаға пайдалы болары анық. Жанар Елдосқызы
2380 рет
көрсетілді0
пікір