• Ақпарат
• 20 Мамыр, 2010

Трансазиялық парламенттік форум: ынтымақтастық бастауы

Жуырда Алматыда «ЕҚЫҰ Еуразиялық өлшемі» Трансазиялық парламенттік форумы болып өтті. Парламентаралық ынтымақтастықтың аясын кеңейту мақсатын көздейтін бұл шара Қазақстанның Еуропадағы Қауіпсіздік және ынтымақтастық ұйымына төрағалық етуі шеңберінде көрініс тапты.

Форумға ЕҚЫҰ-ға қатысушы мемле­кеттер Парламенттерінен, Жерорта теңізі және азиялық әріптестер Ұйымдарынан делегаттар, сондай-ақ Ауғанстан, Пәкістан және Йордания парламентшілері, ха­лықаралық ұйымдар, ғылыми-зерттеу институттары, дипломатиялық корпустардың өкілдері қатысты. Шараның ашылу салтанатында Қазақ­стан Республикасының Президенті Нұрсұлтан Назарбаевтың форумшыларға арналған үндеуін ЕҚЫҰ-ның Іс басындағы төрағасы, Қазақстан Республикасының Мемлекеттік хатшысы – Сыртқы істер министрі Қанат Саудабаев оқыды. Онда бүгінгідей қатерлі заманда бірауызды бола білу және де өзара әріптестікті арттыру керектігі баса айтылған болатын. Жиында Парламент Сенатының Тө­раға­сы, ЕҚЫҰ Парламенттік Ассамблея­сы­ның вице-президенті Қасым-Жомарт Тоқаев сөз алды. Ол өз сөзінде ЕҚЫҰ-ның трансаймақтық ынтымақтастықтағы және қазіргі әлемдегі қатерлерге қарсы іс-қи­мылдағы ЕҚЫҰ-ның ерекше рөлін атап өтті. – Қазақстан, оның реформаларды табыс­ты жүзеге асырудағы және ха­лықаралық қауіпсіздікті қамтамасыз етудегі тә­жірибесімен бұл үдерісті жүргізуге және ЕҚЫҰ-дағы жалғасып келе жатқан оң өзгерістерге өз үлесін қосуға әзір, – деді Парламент Сенатының Төрағасы. Мұнан соң Қазақстан Республикасы Парламенті Мәжілісінің Төрағасы Орал Мұхамеджанов құттықтау лебізін білдірді. Оның айтуынша, парламентаралық форум ЕҚЫҰ кеңістігінде ынтымақтастық пен өзара түсіністік үрдісінде жаңа серпін береді. Өйткені осы маңызды басқосуға қатысушылар өз халқының сенімді өкілдері болып табылады. – Сондықтан да ЕҚЫҰ-ға қатысушы мемлекеттер парламентшілерінің Қазақ­станда басқосуы қазіргі заманғы маңызды мәселелерді тиімді шешудің жолдарын айқындау үшін өте маңызды болып отыр, – деп түйіндеді ол өз ойын. Әрине, айтса айтқандай-ақ, қазіргі таңда ғаламдық қауіпсіздікті қамтамасыз етуде азиялық бағыттың маңыздылығы артуда. Сол себепті де, қайсыбір сарапшылар айтпақшы, ЕҚЫҰ қызметінің еуразиялық қырына қатысты тақырыбы өте өзекті. Бұған дау жоқ. Осыған орай форум барысында бағдарламалық үш сессия жұмыс істеді де. Мұны да айрықша атап өткен жөн. Біріншіден, «Аймақтық қауіпсіздік. Ауғанстан, терроризм және есірткі заттарымен күрес, қарусыздану» тақырыбы қаузалған болса, екіншіден, «Еуразия: Дамушы нарықтар және өріс алған шақырулар. Экономикалық даму, сауда, ресурстарды басқару, еңбек көші-қон, экологиялық мәселелер» атты мәселе талқыға салынды. Ал үшінші ретте «Адамзаттық өлшем. Діни төзімділік, саяси даму, адам саудасымен күрес, гендерлік теңдік» сынды түйткілдері жан-жақты екшеленді. Олардың ішінде Қырғызстандағы қауіпсіздік және тұ­рақ­тылық мәселелері күн тәртібіндегі басты тақырып ретінде сын нысанасынан түспеді. Ерболат МАМЫРАЙХАН