- Ақпарат
- 14 Шілде, 2010
Елбасы оң баға берді
Жақында Мемлекет басшысы Нұрсұлтан Назарбаев Алатаудың баурайындағы Қазақстан Республикасының Тұңғыш Президенті атындағы саябақты аралап көрді. Табиғатты өзіне жақындатып, орманды, бау-бақшалы етіп жасалған тұмса кешенді аралаудың соңы жуырда ғана ашылған ең ірі әрі биік субұрқақты тамашалауға жалғасты.
Бұрынғы әл-Фараби даңғылы мен Дулати көшесінің қиылысындағы ең көркем дендросаябаққа Тұңғыш Президенттің есімі берілгеніне де көп бола қоймаған-ды. Алматы қаласының бас сәулетшісі Сайран Фазылов Мемлекет басшысына саябақтың макетін көрсетіп, аумағы 73 гектардан астам жерді алып жатқанынан, ондағы отырғызылған 8 мың алуан түрлі ағаштың жасы он жыл шамасында екендігінен хабардар етті. Өз кезегінде Мемлекет басшысы саябақтың аумағындағы алдағы уақытта атқарылатын жоспарлармен танысты. Сондай-ақ ол саябақ аумағында гольф-алаңын орналастыру мүмкіндігін қарастыруды, демалыс орнын одан әрі сәулеттендіруді тапсырды. Дендробақ сәулетшілердің идеясы бойынша қаланың табиғи-экологиялық қалқанын қалыптастырудың іргетасы болмақ. Онда Алматының қонақтары мен тұрғындарына демалыс үшін қолайлы жағдай туғызылмақ. Қазір дендробақта шаһардағы ең ірі субұрқақ жұмыс істейді, ол музыкалық және түрлі-түспен безендірілген. Болашақта дендробақтың орталық бөлігінде танымдық сипаттағы нысандар орналастырылады, атап айтқанда, жабық климатрондарда оңтүстік және солтүстік жарты шардың өсімдіктері өсіріледі, тау өзенінен ландшафтық композициялар, жасанды су көздері мен тау жыныстары жасалады. Ал ертеңіне Елбасы 2011 жылы VII Қысқы Азия ойындары өтетін Алматыдағы Балуан Шолақ атындағы спорт сарайында болды. Онда спорт сарайының директоры Юрий Захарин қонақтарды соңғы атқарылған істер тізбегімен таныстырды. Мемлекет басшысы ондағы күрделі жұмыстарының барысына өз ризалығын білдірді. Онда алдағы уақытта жабық кешендегі Азия ойындары өтетінінен құлағдар болды. Сондай-ақ шілденің 6-11-і күндері өткен «ҚР Президенті кубогі» XVII Халықаралық турнирінде биыл қатарынан екінші рет бірінші орын алған волейболдан Қазақстан әйелдер құрамасының ойыншыларымен кездесіп, оларды жеңістерімен құттықтады. – 40 жылдан астам уақыт бойы жұмыс жасап келген спорт сарайы физикалық және моральдық жағынан әбден тозған болатын. Өткен жылы басталған күрделі жұмыстардың қазір 95 пайызы аяқталды. Онда трибунадағы орындар 5 мың орынға дейін ұлғайтылып, 10 мың шаршы метрлік бірқатар қосымша спорт бөлмелері салынды. Жыл соңына қарай 650 орындық көлік тұрағы мен жаттығу мұзайдыны іске қосылмақ, – дейді Юрий Захарин. Оның сөзіне қарағанда, жөндеу жұмыстарына алғашқы кезекте 14,5 миллиард теңге жұмсалған. Қазір екінші кезектегі жөндеу жұмыстарының сметасы жасалып жатыр. Оған 7-8 миллиард теңге бөлінбек көрінеді. Ерболат МАМЫРАЙХАН
2610 рет
көрсетілді0
пікір