- Ақпарат
- 14 Шілде, 2010
Алаштың әр баласы ана тіліне алаңдауы керек
Күнделікті күйбеңмен тұрмысымыздың кем-кетігін жамауда алдымызға жан салмаймыз, ал қазақ тілінің мемлекеттік тіл болып қалыптасуы өзімізге байланысты екенін түсінігіміз келмейтіндей. Тіпті әдейілеп кіріспесек те, жол-жөнекей қолымызға ұсынылған қағазға қарап мазмұнына мән бергенімізбен, ана тіліміздің қолданылуына көңіл бөлмейтініміз бар. Ұлтымыз – қазақ, ана тіліміз – қазақ тілі болғандықтан, мемлекеттік тілге деген құрметіміз болуы керек емес пе?! Бұны, ең алдымен, еліміздің болашағы – жастарымыздың бойына сіңіруіміз керек. Былтыр шілде айында Қарағанды қаласындағы «Водоканал и К» ЖШС-нен хабарлама алған едім. Пәтерімдегі су есептегіш құралдарын тексерту мерзімі келгені жөнінде екен. Құжаттың астыңғы жағында жап-жақсы жарнамасы бар. Алайда мемлекеттік тілде бірде-бір сөзді көре алмадым. Бұрын-соңды аталмыш кәсіпорын операторы су есептегіш көрсеткішін телефон арқылы қазақ тілінде қабылдамай жүрген. «Мен сөйлеген тілде сөйлемедің» деп, тұтқаны қоя салатын. Ай сайын қайталанатыны осы еді, шыдап-ақ жүргенмін. Мына хабарламаны көрген соң, тіл қолданысы бойынша құқымның бұзылып жүргенін айтып, «Водоканал и К» кәсіпорнының директоры М.О.Ермолаевтың атына хат жолдауды жөн көрдім. Хатта мәселелерді көтере отырып, хабарламаны мемлекеттік тілде жіберуін сұраған едім. Талабым орындалып, ұзақ күттірмей кәсіпорын хабарламасы мен жарнамасының қазақ тілдегі нұсқасы қолыма табысталды және бұдан былай телефон арқылы ақпараттың қазақ тілінде де қабылданатыны айтылды. Тағы бір жолы қалалық салық басқармасы өзінің салық салу жөніндегі хабарламасы мен түбіртегін әдеттегідей бір тілде жазып әкелген еді, мен қалалық салық басқармасына хабарлама мен түбіртекті мемлекеттік тілде жіберуді сұрап, хат жолдадым. Бастықтың орынбасары Т.Горяевтен хат келді. Сөйтіп, жер салығы мен мүлік салығының хабарламалары да, түбіртектері де мемлекеттік тілде жеткізілді. Былтыр осылайша мемлекеттік тілдің жоқтаушысы болып, ана тіліміздің мерейін бір көтеріп қойғанымыз бар. Биыл «Водоканал и К» кәсіпорны біздің қалада жұмыс жасамайды (су есептегіш құралдарын бес жылда бір тексереді екен). Сондықтан құжаттарын әлі де мемлекеттік тілде жазып жүр ме, жоқ па – біле алмай жүрмін. Ал қалалық салық басқармасы биыл да бір істі екі етпей, салық төлеу хабарламасын тәуелсіз Қазақстанның мемлекеттік тілінде салар деген ойдамын. Жалпы, әр азамат хабарламалардың, бланкілердің, өтініш үлгілерінің мемлекеттік тілдегі нұсқасын талап етіп, ана тілінің жоғын жоқтаса, мемлекеттік тіліміздің мерейі үстем болары сөзсіз. Бұған күмәніміз жоқ. Төлен РАМАЗАНҰЛЫ ПАВЛОДАР
3097 рет
көрсетілді1
пікір