- Ақпарат
- 13 Сәуір, 2011
Көп тілегі – кие
Тәуелсіздігіміздің жиырма жылында Қазақстанның дамылсыз дамуында халқымыздың азаматтық санасының да ел болашағына деген адал сеніммен өскені 3 сәуірде өткен Ел Президентін сайлау қорытындыларында айқын дәлелденді. Жаратылысынан өмірге іңкәр, бейнелеп ойлайтын халқымыз елтұтқа тұлғаларын ұрпақтан ұрпаққа құрметтеп, үкілі үмітіне, арман-мұратына бірге жетеміз деген сенімін білдіріп отырады емес пе! Нұрсұлтан Әбішұлының, бүгінгі Ел Президентінің кезектен тыс сайлауында халқымыздың шынайы сүйіспеншілігіне бөленіп, теңдессіз жеңіске жетуін осындай азаматтық адал сана-сезімінің, отаншылдығының жарқын көрінісі деп білемін.
Өйткені халық ғасырлар бойында аңсаған тәуелсіздікке қол жеткізген елдің, мүлдем жас мемлекеттің тізгінін Нұрсұлтан Әбішұлы өз қолына алғалы, Қазақ елі әр аптасы жылға татитын, әр жылы ғасырға тұрарлық қарқынмен өсіп, кемелденіп келеді. Қырық жылдық ұстаздық еңбегімнің барысында талай-талай сайлаулардың қоғамдық қолдаушысы әрі куәсі болғандықтан, кешегі Елбасы сайлауын ерекше мәнді, халықтық сайлау деп айта аламын. Ұстаз – мемлекет өкілі, сондықтан ол қашан да болса барлық сайлауда ынтызарлы көмекші болып табылады. Бүгінде бұл сайлаудың Конституциямызға толығынан сәйкес, әділ, барынша ашық түрде және сайлаушылардың белсенді қатысуымен өткені баршамызға мәлім. Ол баспасөзде толық жарияланды. Сайлау қорытындысында Нұрсұлтан Әбішұлы Назарбаевты халқымыз бірауыздан Қазақстан Республикасының Президенті етіп сайлады, Елбасымыз елімізді басқарып келе жатқан сара жолын одан әрі жалғастыруда. Елімізде және бүкіл әлемде оң ниетте бағаланып отырған сайлаудың жоғары сапалылығы мен Ел Президенті кандидатурасының бүкіл халық тарапынан дұрыс таңдалғандығы, менің өз бақылауымша, төмендегідей негіздерден тамыр алса керек: Біріншіден, Қазақстанның әлемдік өркениет көшіндегі даму стратегиясы табысты және барша халық үшін ізгілікті де игілікті нәтижелермен орындалып келе жатқанына әрбір қазақстандықтың көзі жетіп отыр. Екіншіден, Елбасымыздың 2011 жылғы Қазақстан халқына «Болашақтың іргесін бірге қалаймыз!» атты Жолдауында қорытылып, тұжырымдалған Тәуелсіздігіміздің жиырма жылында қол жеткен жетістіктеріміз Нұрсұлтан Әбішұлы Назарбаевтың тікелей өз басшылығымен, өз жауапкершілігімен жүзеге асқанын халқы, елі оң бағалады. Үшіншіден, осынау ел игілігі үшін дамылсыз дамуымыздың болашақ стратегиясының бірден-бір дұрыс анықталып отырғанына халық сенімінің берік әрі күмәнсіз орныққандығы деп ойлаймын. Төртіншіден, еліміздің бүгіні мен ертеңі үшін әрбір қазақстандықтың өзінің жауапкершілігін, өзінің қатыстылығын сезінген көзқарасы қалыптасқанын көрсетті. Бесіншіден, өзара достық, бірлік, келісім, татулық Қазақстан халқының өмір салты болып салтанат құрды. Алтыншыдан, еліміздің бірден-бір жетекші партиясы «Нұр Отан» ХДП-ның платформасы сайлауда жеңіске жетті, оның бағыт-бағдары Қазақстан халқының мүддесін адал қорғайтын күшке және еліміздің дамуында қозғаушы тетікке айналды. Міне, менің ойымша, 3 сәуірдегі сайлау өзінің осынау тамырларының мызғымас беріктігіне негізделгенін әлемге паш етті.
Аягүл МИРАЗОВА, Қазақстанның Еңбек Ері, Ы.Алтынсарин атындағы №159 гимназияның директоры
2401 рет
көрсетілді0
пікір