- Ақпарат
- 06 Қаңтар, 2012
Жаңа жылда жалғасқан дода
Өткен жылдың соңғы кезеңінде ел Парламентінің Мәжілісі өз жұмысын тоқтатып, көппартиялы Парламент жасақтау туралы шешім қабылданған еді. Сөйтіп, кезектен тыс Мәжіліс сайлауын өткізуге белді бекем будық. Сонымен, бұл саяси додаға сегіз саяси партия өз үміткерлерімен тіркелгенін білеміз. Енді сайлау науқанында партиялардың үгіт жұмыстары қалай жүріп жатыр? Соған аз-кем тоқталып өтсек...
ОСК-ға ең алғашқы болып тіркелген «Нұр Отан» халықтық демократиялық партиясы үгіт-насихат жұмыстарын желтоқсан айының ортасында бастап жіберген. Олардың Ақмола облысының Ақкөл ауданы Наумовка селосында алғаш болып өз сайлаушыларымен кездескенін білеміз. «Қазақстан. 2017 мақсаттары. Ұлттық іс-қимыл жоспары» сайлауалды тұғырнамасы басымдықтарының бірі – ауылды дамыту мәселесі болғандықтан, партия өкілдері өз кездесулерін ауылдан бастағанды кездейсоқтық санамады. Жалпы, «нұротандықтар» өздерінің сайлауалды тұғырнамаларын елге жан-жақты таныстырып, басында Елбасы басшылық ететін партиямен бірге болса, халықтың әл-ауқаты артатынын айтып, сайлаушылардың назарын аударуда. Қазіргі таңда партия өкілдері еліміздің барлық өңірлерінде түрлі іс шаралар өткізіп келеді.
***
Қазақстан коммунистік халық партиясы да сайлау науқанына қызу кіріскен. Қазіргі таңда партияның жер-жердегі өкілдіктері қарқынды жұмыс істеп жатыр. ҚКХП өкілдері өңірлерде жастардың қатысуымен түрлі шараларды қолға алды. Облыс аймақтарында жаңажылдық флешмоб ұйымдастырып, қызыл қалпақ киген жастар көшеде жаңажылдық құттықтауларымен үгіт қағаздарын таратты. Дәл осындай мерекелік акция Тараз қаласында да өтті. Осылайша, «Халықтың болашаққа деген құқықтарын қайтарамыз» атты сегіз міндеттен құралатын сайлауалды бағдарламасын ұсынған, саяси тұғырнамасында қоғамдық дамудың жаңа жағдайларына бейімделген маркстік-лениндік идеологиясы бар ҚКХП-ның белсенділері Парламент Мәжілісінен қалайда болсын орын алуға күш салуда.
***
«Әділет» демократиялық партиясының да сайлауалды үгіт-насихат жұмыстары қарқынды жүріп жатыр. Партия жетекшісі Мақсұт Нәрікбаев Жаңаөзенде орын алған оқиғаға қатысты өз пікірін білдіріп, Елбасыға ашық хат жолдады. Жамбыл облысында партия белсенділері БАҚ өкілдерімен баспасөз мәслихатын өткізіп, өңірдің көкейтесті мәселелерін талқылады. Алматы, Ақтөбе, Көкшетау, Орал, Қарағанды, Қостанай, Қызылорда, Павлодар және Шымкент қалаларында «Әділет ардагерлер үшін!» атты акция өткізді. Жалпы, партияның жүзеге асырғалы отырған жұмыстары он жеті қадамға бөлінген. «Әсіресе, әлеуметтік мәселелер, жемқорлықпен күрес, мемлекеттік тіл және дін жағдайына аса назар аудару керек», – деп санайды партия белсенділері.
***
Халықтың әлеуметтік жағдайын басты назарға алып, Алматыда үгіт-насихат жұмыстарын бастаған Қазақстан Патриоттары партиясының жер-жердегі өкілдіктері де өздерінің саяси дода алдындағы жұмыстарына белсене кіріскен. Өңірлердегі өз сайлаушыларымен кездесу барысында партия белсенділері шағын және орта бизнесті түбегейлі қолдай отырып, қуатты экономикалық кеңістік жасауды қалайтындықтарын жеткізуде. Жергілікті тұрғындармен кездесуде «патриоттықтар» мүгедектер қоғамының өкілдерімен де кездесулер өткізді. Үгіт-насихат кезінде олар елдегі экономиканың барлық саласында жаңғыртулар жасап, әлемдік интеграцияға бет бұруға сөз беруде. Еліміздің аймағында жұмыс істеп жатқан барлық шетел инвесторларын экологиялық стандарттарды сақтауға шақырып, мұқият қадағалау керектігін де назарға алған.
«Ақ жол» партиясының бұл сайлаудан үміті зор. Бұл додаға «ақжолдықтар» сақадай-сай дайын. Тұғырнамасы да көңіл көншітерлік 10 бағыттан тұрады. Партия көбіне, әлеуметтік мәселелерді шешуді ұйғарыпты. Жұмыссыздықпен күрес, тұрғын үй мәселесі мен өңірдегі халықтың ахуалын көтеру – басты міндеттерінің бірі. Оның үстіне, кәсіпкерлерді қолдау да партия тұғырнамасында ерекше орын алған. «Ақ жол» демократиялық партиясының үгіт-насихат тобы өткен жылдың соңғы күндерінде жұмысын қыздырды. «Ақжолдықтар» «қазақстандықтардың ең төменгі күнкөріс көлемі 58 мың теңге болуы керек» деген бастама көтеріп отыр. Олардың айтуынша, ең төменгі күнкөріс көлемі мен ең төменгі тұтыну бюджеті қазақстандықтардың шынайы сұранысы мен сауда болмысына сай емес. Сондықтан партия қатарындағы кәсіпкерлері «ІЖӨ 11 мың долларды құрайтын елімізде барлық әлеуметтік стандарттар қайта қаралуы керек» деп есептейді.
***
Қазақстан социал-демократиялық «Ауыл» партиясы өздері жоспарлағандай, барлық ауылдарда үгіт жұмыстарын жүргізіп, тұрғындармен кездесу өткізуде. Осы сөзімізге дәлел ретінде, сәрсенбі күні «ауылдықтардың» Жамбыл облысы Жуалы ауданының тұрғындарымен кездесуін атауға болады. «Аты «Ауыл» деп аталғанымен, біздің партия қала мен далаға ортақ проблемаларды қамтиды. Себебі елімізді азық-түлікпен қамтып отырған ауыл шаруашылығы екені даусыз. Ендеше, ауыл тұрмысы, ондағы өзекті мәселелердің күрделі жолдарын бірлесіп шешу керек», – дейді «ауылдықтар».
***
Алғашқылардың бірі болып Жаңаөзен мен Шетпедегі жағдайға байланысты тәуелсіз қоғамдық комиссия құру қажеттігін мәлімдеген Жалпыұлттық социал-демократиялық партиясы да өз жұмыстарын жандандыруда. Өңірлерде өз жақтастарымен кездесулер өткізуді бастаған партияның сайлауалды бағдарламасында баға мен тарифтің өсуін тоқтату, баспана мен сапалы медицинаға қолжетімділік, шағын және орта бизнесті салықтан бес жылға босатып, жеңілдетілген несиемен қамтамасыз ету секілді шаралар айтылған. «Партия Парламенттен орын алған жағдайда зейнетақы, жәрдемақы және шәкіртақыны үш есеге өсіру жолын қарастырамыз», – дейді үміткерлер.
Бейбітгүл Әбдіғаппарқызы
2247 рет
көрсетілді0
пікір