- Мәдениет
- 08 Ақпан, 2012
«Жыр әуені» осындай атпен ақын Әнуәрбек Әуелбектің шығармашылық кеші өтті
Қазақстан Жазушылар одағының Әдебиетшілер үйінде ақын Әнуәрбек Әуелбектің 50 жасқа толуына орай «Жыр әуені» атты сазды-шығармашылық кеші болып өтті. Әнуәрбек Әуелбек – поэзия әлемінде өзіндік үні бар, журналистика саласында өзіндік қолтаңбасы бар қарымды қаламгер. Ақынның жүрегін тербеген жыр жолдары оқырманын да бейжай қалдырмайды. «Ақ жауынды шақ», «Жаныңмен жаз сырыңды» атты жыр жинақтарындағы өлеңдер мына өмірге ерекше жылылық сыйлайтындай: Сезiм боп туған екенмiн, Жүрегiң – менiң мекенiм. Ән болып қалқып ұшқанда, Қондырмай қойсаң не етемiн, Қона алмай қайтiп кетемiн? – дейді ақын. Әнуәрбек Әуелбектің шығармашылық жолы – бір шеті поэзиямен байланысты болса, екінші қыры – публицистикалық дарынымен өріле түскен. «Аралым – арым», «Балқашым – бағым», «Қызыл қырғын», «Қажымұқан қағанаты», «Азаттық аңсағандар» атты жинақтарына енген мақалалары осы сөзіміздің дәлелі іспеттес. Сөз өнерін жастайынан серік етіп, саналы ғұмырын журналистік өнерге арнап келе жатқан қаламгердің кезінде «Хабар» телеарнасында ұйымдастырған «Солай болған...» атты авторлық бағдарламасы да көпшілік есінде. Қаламгердің қолынан туған әсерлі мақалалары республикалық басылым беттерінде жарияланып келеді. Өзі кезінде қызмет жасаған «Егемен Қазақстан», «Жас Алаш», «Түркістан» тәрізді белді басылымдардағы айшықты жазу мәнері де көзіқарақты оқырманын қуантып келсе, бүгіндегі «Алматы ақшамы» газетіндегі еңбегі – бір төбе. Ердің жасы елуге келіп, осы күнге дейінгі жеткен жетістігін көрерменге ұсынуды қалаған ақын: «Елдің алдына шығып, шығармашылық есеп бергім келді», – деп ағынан жарылды. Шығармашылық кеш Құрманғазы атындағы мемлекеттік академиялық оркестрдің орындауындағы «Сарыарқа» күйімен ашылды. Ақынның мерейтойына арнайы келген Халықаралық «Қазақ тілі» қоғамының президенті, академик Ө.Айтбайұлы, белгілі сатирик К.Әмірбек, «Алматы ақшамы» газетінің бас редакторы Қ.Сәрсенбай, Қазақстан Жазушылар одағы басқармасы төрағасының орынбасары Б.Шаханов, әдебиет зерттеушісі, ғалым Т.Тебегенов, ақын Б.Шарахымбай, Қызылорда облысы Шиелі ауданы әкімінің орынбасары Х.Оңғаров және басқалар сөз сөйлеп, кеш иесіне арнап өздерінің жылы лебіздерін білдірді. Ақынның шығармашылық кешіне ән мен жырды ерекше бағалайтын жұртшылық көп жиналды. Бұл кеште біз ақынның сөзіне жазылған әуезді әндерді тыңдасақ, одан кейін ақынның өзі шығарған бірнеше лирикалық әндеріне де тәнті болдық. Д.Төлебаев
3452 рет
көрсетілді0
пікір