- Мәдениет
- 22 Наурыз, 2009
«Наурызнама» шақырады
Қазақ халқы ежелден 22 наурызды Жыл басы санаған. Бұл күн – «Самарқанның көк тасы еріп», Күн мен Түннің теңелген кезі. Күллі мұсылман қауымының ерекше дәріптейтін мейрамы әрі Көктем мерекесі саналатын Наурыз қандай да сән-салтанатқа лайық. Осы орайда рухани дүниелерге қолдау көрсетіп жүрген өнер ұжымдарының бірі – «Еламан» продюсерлік орталығы (төрағасы Айтмұқан Сқақов) атаулы мерекеге арнап елеулі мәдени шара ұйымдастырмақшы. Құрметті ханымдар мен мырзалар! «Еламан» продюсерлік орталығы Сіздерді 25 наурыз күні, кешкі сағат 18.30-да Алматыдағы Республика сарайында өтетін «Наурызнама» атты Ұлыстың Ұлы күніне арналған думанды кешке шақырады. Кеш барысында ұлтымыздың салт-дәстүрлері мен басқа да рухани құндылықтарымызды дәріптейтін арнайы театрландырылған қойылымдармен қатар, есімдері елге белгілі өнер қайраткерлері Бибігүл Төлегенова, Ескендір Хасанғалиев, Роза Рымбаева, Нұрғали Нүсіпжанов, Ақжол Мейірбеков және танымал эстрада әншілері Бақыт Шадаева, Алтынай Жорабаева, Тамара Асар, Айгүл Иманбаева, «Нұр-Мұқасан», «Жігіттер» тобы, Жанболат пен Жазираның қатысуымен әдемі әуенге толы әсерлі концерттік жоба жүзеге асырылмақ. Бұған қоса салтанатты кештің көрігін қыздырып, ән шеруді әзілмен көмкеріп отыратын Нұржан Тұтов, КВН командасы өз өнерлерін ортаға салмақ. Кештің тізгінін ұстаушы – белгілі жүргізуші Гүлмира Дайрабаева. Ұлтымыздың ұлы мерекесін әуезді әуендермен асқақтататын «Наурызнама» думанды кешіне асығыңыздар! Жыл басын, Көктем мерекесін бірге атап өтейік. Кешіміз көрерменімен ғана көрікті!
3052 рет
көрсетілді0
пікір