• Руханият
• 03 Мамыр, 2012

Киелі домбыраның қоңыр үні

Ықылас атындағы музыкалық халық аспаптары мұражайында күйші-композитор Сүгір Әлиевтың 130 жылдығына арналған «Қаратау шертпесі» атты лекция-концерт өтті. Ол Құрманғазы атындағы Қазақ ұлттық консерватория­сы­ның аға оқытушысы, мәдениет қайраткері Мұрат Әбуғазы және «Қазақ» радиосының музыкалық редакторы, күйші Сәрсенғали Жүзбаев, жас орындаушы Талант Кезекеновтың қатысуымен өтті. Күйші Сүгір Әлиевтың шығармашылық өмірі жайында, күйшілік орындаушылығы жайында Сәрсенғали Жүзбаев баяндама жасады. Сүгір күйлерін зерттеп, кітап жазған Мұрат Әбуғазы «Қаратау шертпелі күй дәстүрін» еліміздегі басқа күйшілік мектептермен салыстыра отырып, Сүгір орындаушылығының ерекшеліктері жайында көрермендерге жан-жақты мәлімет берді. Талант Кезекенов Сүгір күйшінің көрнекті шәкірттерінің бірі Төлеген Момбековтың «Салтанат», «Ел жаңа», «Қосбасар» күйлерін орындады. Сәрсенғали Жүзбаев мұражайда сақталып тұрған Сүгір күйшінің домбырасымен «Қаратау шертпесінің» екінші нұсқасын және «Бозінген» күйлерін орындап берді. Кеш соңында мұражай директорының міндетін атқарушы Е.Әлімқұлов мұражайға келген қонақтар мен қатысушыларға естелік сыйлықтар тапсырып, мұражай ұжымының атынан алғыс білдірді.