• Мәдениет
• 10 Мамыр, 2012

Ардагерлеріміз – мақтанышымыз

Республикалық кітап мұра­жайында Ұлы Жеңіс­тің 67 жылдығына арналған «Ұлы ерлікке тағзым» атты көрменің ашылу салтанаты болды. Шара ақын, майдангер Жұмағали Саинның туғанына –100 жыл, Кеңес Одағының батыры Мәншүк Мәметованың туғанына – 90 жыл, майдангер, халық жазушысы, Ұлы Отан соғысының ардагері Әзілхан Нұршайықовтың туғанына – 90 жыл толу мерейтойларына да арналды. Көрмеге Жұмағали Саинның таңдамалы шығармалары, 1952, 1957 жылы шыққан үш томдық кітаптары қойылды. Ұлы Отан соғысының ардагері Сейдәлім Тәнекеев, Ауған соғысының ардагері Ер­кін Байтоқаев, Даманск оқиғасының ардагері Оңғар­бек Сыдықбеков қатысып, сөз сөйледі. Ұлы Отан соғысының ардагері, жазушы С.Тәнекеев көрменің тұсау­кесерін қиды. Көрменің ашылу салтанатында Ұлы Отан соғысының ардагері, жазушы, академик, кітап мұражайының директоры Н.Қапалбекұлы сөз сөйлеп, келген қонақтарға алғысын білдірді. М.Әуезов атындағы Әдебиет және өнер инсти­тутының бас ғылыми қызметкері, филология ғылым­дарының докторы Н.Ақыш соғыстың мәнін, майдангерлер ерлігі жайлы көрермендерге ашып түсіндіріп, кітаптарын қолтаңбасымен сыйға тарт­ты. Қазақстан Республикасы Қарулы Күштерінің Құрлық әскерлері әскери институтының факультет бастығының тәрбие және әлеуметтік-құқық жө­ніндегі орынбасары подполковник Е.Байсеркеев, радио электроника және байланыс-әскери ин­же­нер­лік институтының аға офицері, майор А.Жүніс­әлиев көрмені тамашалап, сөз сөйледі. Осы аталған институттың курсанттары Ұлы Отан соғысы туралы, ерлік, Отан қорғау тақырыбына өз пікірлерін білдірді. №159 мектеп-гимназияның оқушылары Р.Алмат, Н.Дәулетбек, С.Әмірбек батырларымызға арнау өлең оқыды. Кітап мұражайында ашылған «Ұлы ерлікке тағзым» атты көрме жыл аяғына дейін көрермендерге көрсетілетін болады. Ж. САҚАТОВА, Республикалық кітап мұражайының аға ғылыми қызметкері