- Тарих
- 10 Мамыр, 2012
Қаламгерлерді еске алды
Елордадағы Жастар мәдениет сарайында Астана қаласының қарыштап дамуына, рухани бейнесінің қалыптасуына атсалысқан белгілі журналистер Ақселеу Сейдімбек, Дүкеш Байымбетов, Владимир Коченов, Жомарт Әбдіхалық, Рафаэль Жұмабаев, Талғат Ілімжан, Владимир Бойко, Жұматай Сабыржанұлы, Шәкизада Құттаяқов, Алмас Жолтаев, Мадрид Рысбеков, Нөгербек Мағзұмов, Октябрь Әлібек, Олег Квятковский, Біржан Белғараларды еске алуға арналған кеш өтті. Мәні мен маңызы ерекше мәдени шараға марқұмдардың отбасы мүшелері қатысты. Шара барысында өмірден ерте өткен дарынды журналист-қаламгерлерге арналған бейне-сюжеттер көрсетіліп, естеліктер айтылды.
Жұматай Сабыржанұлы «Ана тілі» газетінің Ақмола өңіріндегі меншікті тілшісі бола жүріп туған тіліміздің тағдыр-талайы туралы сүбелі мақалалар жазды. Өмірден ерте озған қаламгердің соңында мол мұралары қалды. Олар бүгінде оқырман қауымның рухани азығына айналып отыр.
Осы кеште Ж.Сабыржанұлының жары белгілі журналист, қаламгер Әмина Мүржісіпқызына «Қазақ газеттері» ЖШС атынан сый-сыяпат көрсетіліп, Серіктестіктің Бас директоры – Редакторлар кеңесінің төрағасы Ж.Кенжалиннің арнайы құттықтау хаты оқылды. Оны «Ана тілі» газеті бас редакторының бірінші орынбасары Н.Домбай табыс етті.
Астана қаласы Мәдениет департаменті ұйымдастырған кеште еліміздің танымал өнер жұлдыздары Мәдина Сәдуақасова, Бекболат Байсағатов, Cepiк Оспанов, Естай Мұқашевтар өнер көрсетті. Айта кету керек, дарынды журналистерді еске алуға арналған шара биыл тұңғыш рет ұйымдастырылып отыр. Кештің бастамашылары әpi негізгі қолдаушылары «Ұлы дала қырандары» әлеуметтік-мәдени республикалық қозғалысының теңтөрағалары, журналистер Сәдібек Түгел мен Марат Нәбиев.
Естеріңізге салсақ, 1998 жылдын 4 сәуірінде Елордада Астана қаласының Халықаралық баспасөз орталығы құрылған болатын. Онда мыңнан астам брифингтер мен баспасөз мәслихаттары жоғары деңгейде өтіп, нәтижесінде жаңа Елордамыз туралы барлық газет-журналдар беттерінде жақсы мақалалар мен очерктер жарыққа шықса, теледидарлар мен радиолар арқылы көптеген бейне және аудио сюжеттер әзірленген еді. Елордалық журналистер Астана қаласының бейнесін БАҚ беттерінде жан-жақты көрсетуге күш салды. Аталмыш Халықаралық Баспасөз Орталығының жаңалықтары мен хабарларына үн қосып, баспасөз беттерінде көрсете білген дарынды қаламгер-журналистердің еңбегі ешқашан ұмытылмақ емес.
Бейбітгүл Исаева
АСТАНА
3672 рет
көрсетілді0
пікір