- Ақпарат
- 10 Мамыр, 2012
Жазушымен жүздесу
Алматы қаласының әкімі Ахметжан Есімов биылғы жылды Алматыдағы «Мәдениет жылы» деп жариялағаны белгілі. Осыған орай қала көлемінде түрлі мәдени шаралар атқарылып жатыр. Білім беру мекемелерінде мәдениет пен өнер қайраткерлерімен кездесулер өтуде. Соның бірі – Алматы қаласы, Медеу ауданы, Ж.Жабаев атындағы №161 лицейде кітапхана меңгерушісі Қ.Рахымбаеваның ұйымдастыруымен өткен «Қазақ әдебиетіндегі тұғырлы тұлға» атты кеш. Кештің құрметті қонағы белгілі жазушы, драматург, ҚР Мемлекеттік сыйлығының иегері Дулат Исабеков болды. Жазушымен кездесуге мектеп оқушылары мен мұғалімдері қатысып, қазақ тілі мен әдебиет пәнінің мұғалімі А.Әбдіқайымова жүргізіп отырды.
Кездесу барысында Дулат Исабеков өзінің жазушылық өмірінен сыр шертті. Оқырман жүрегінен орын алған шығармаларының жазылу тарихы мен мазмұны жайында кеңінен әңгіме қозғады. Алғашқы қалам тербеу сәтін, өміріндегі айтулы оқиғалар мен қызықты жайттарды баяндады. Сұхбат кезінде жазушы туралы слайдтар көрсетіліп, әңгіме, повестерінен үзінділер оқылды. Лицей оқушылары қаламгермен емен-жарқын сырласты. Өздерінің оқыған әдеби туындылары, одан алған әсерлерімен бөлісті. Сөз арасында жазушыға сұрақтар қойып, кештің көркін қыздыра түсті. Әңгіме аясында Дулат Исабеков сонымен қатар қазіргі әдебиет, оқушылар оқулығындағы шығармалар, театрларда сахналанып жүрген қойылымдары жөнінде айтып берді. Кездесуді лицей директоры Е.Қуатбеков қорытындылады. Ол 70 жасқа толғалы отырған жазушының иығына шапан жауып, қалам иесіне шығармашылық табыс тіледі. Оқушылар жазушыдан естелікке қолтаңба алды. Соңынан драматургтың «Әпке» пьесасынан үзінді көрсетіліп, кеш соңы оқушылар әзірлеген концертке ұласты.
Руслан Сейтқазиев,
Ж.Жабаев атындағы
№161 лицейдің мұғалімі
Алматы
3349 рет
көрсетілді0
пікір