• Ақпарат
• 10 Мамыр, 2012

Маңызы зор кездесу

Таяуда «Мариотт» қонақүйінің конференц-залында Қазақстан Республикасы Білім және ғылым министрі Бақытжан Жұмағұлов Финляндия және Ирландия мемлекеттерінің Білім министрлерімен екіжақты кездесу өткізді. Финляндия Республикасының Білім министрі Юкка Густафссон мырзамен өткен кездесу барысында Финляндиядағы жоғары педагогикалық білімге, талапкерлерді іріктеу мен оқудың практикалық құрамы және жоғары оқу орындарында педагогикалық мамандарды даярлайтын сапасы туралы бірқатар мәселелер талқыланды. Сонымен қатар, министрлер профильдік мектеп білімі жүйесінің деңгейі мен оның жоғары білімге сабақтастығы жөнінде де ойларын ортаға салды. Кездесу нәтижесі бойынша Б. Жұмағұлов пен Юкка Густафссон Қазақстан Республикасы Білім және ғылым министрінің орта және жоғары оқу мен ғылым саласындағы тәжірибелерімен танысу мақсатында Финляндияға жоспарланған сапары туралы талқылады. Сондай-ақ, Б. Жұмағұлов Ирландияның Білім және зерттеу министрі Рори Куиннмен екіжақты кездесу өткізді. Кездесу барысында екі елдің білім министрлері бірқатар ауқымды тақырыптарды талқыға салды. Соның ішінде – Ирландияның жоғары білім саласының Болон декларациясына қол қойылған сәтінен бастап жаңашаландыру кезіндегі жеткен нәтижелері жөнінде айтылды. Өз кезегінде, Қазақстан бұл декларацияға жақында ғана мүше болғандығын атап өту қажет. Кездесу қорытындысы бойынша Қазақстан мен Ирландия мемлекеттері арасындағы білім саласы бойынша өзара түсіністік туралы келісімге қол қойылу жөнінде айтылды. Н.ҚҰМАР