- Ақпарат
- 14 Маусым, 2012
Жәдігерлер шерткен сыр
Алматы қаласындағы «Ғылым ордасы» мемлекеттік кәсіпорнының жұмысымен көпшілік жақсы таныс. Оның мақсаты ғылымды, техникалық прогресті дамытуға, ғылыми жетістіктерді өмірге енгізуге ықпал ету. Мұнда ұлттық тарихи-мәдени және ғылыми мұраларды сақтап, көбейтуге, оларды одан әрі зерттеп, жан-жақты насихаттауға көңіл бөлінеді. «Ғылым ордасындағы» бір ерекшелік – осында Қазақстан ғылымының тарихы, Сирек кездесетін кітаптар, Археология, Табиғат мұражайы деген төрт мұражай орын тепкен. Археология мұражайының ашылуы ХХ ғасырдың 20-жылдарынан бастап, қазақстандық ғалымдардың бірнеше ұрпақтарының жұмысымен, отандық археология ғылымының даму барысымен тікелей байланысты. Ғалымдардың еліміздің барлық аймақтарында жүргізген көпжылдық зерттеулері Қазақстанның ежелгі және ортағасырлық тарихын суреттейтін бай және бірегей материалдарды жинауға мүмкіндік берді. Көп жылдық археологиялық экспедициялар барысында табылған жәдігерлер, ғылыми тұрғыда зерттеліп, қазіргі таңда көпшілік қауымның назарына ұсыну үшін Археология мұражайының көрмелеріне қойылды. Қазақстандық археологияның маңызды жәдігерлерінің бірі – Есік қорғанынан табылған «Алтын адам» осы мұражайда зерттелді. Зерттеулердің негізінде В.Садомсков «Алтын адамның» ең алғашқы көшірмесін құрастырды. «Алтын адам» Қазақстан ғылымының жетістіктерін, даму кезеңдерін паш етті, мұражайдың маңызды экспонаттары тізіміне енді. Қазіргі таңда Археология мұражайы «Ғылым ордасы» РМК құрамында жұмыс істей отырып, еліміздің барлық аймақтарындағы археологтардан қазба материалдарын қабылдап, қор жинақтау жұмыстарын жүргізіп отыр. Мұражай қорындағы және жаңадан қабылданған материалдар негізінде тас ғасырынан бастап, орта ғасырларға дейінгі Қазақстанның ежелгі тарихының барлық кезеңдерін бейнелейтін жаңа ғылыми экспозиция құрылды. Экспозицияда бірегей, әлемдік маңызы бар, қола дәуірінің қазбаларынан алынған материалдар, сақтар мен үйсіндер дәуіріне жататын коллекциялар, ортағасырлық Отырар, Тараз, Түркістан, Талғар қалаларында жүргізілген қазба жұмыстарының нәтижесінде табылған керамикадан, шыныдан жасалған заттар және тиындар қойылған. Қазақстан ғылымының тарихы мұражайы – Қазақстан ғылымының тағдыры жайлы сыр шертеді, ғылым мен өркениет тарихына арналған. Отандық ғылымның бастауындағы Әбу Насыр әл-Фараби, Қожа Ахмет Ясауи, Мұхаммед Хайдар Дулати сынды ортағасырлық әлемдік ғұлама бабаларымыздың еңбектері мұражай экспозициясында орын алған. Келесі экспозиция Орта Азия мен Қазақстанды зерттеген ресейлік тарихшыларға, яғни Қазақстан ғылымының дамуына терең із қалдырған ірі ғалымдарға арналған. Олардың қатарында Н.Я.Бичурин, Г.И.Спасский, А.И.Левшин, В.В.Вельяминов-Зернов, В.В.Григорьев және басқалар бар. Бұл ғалымдардың еңбектерінде қазақ халқының тарихы мен мәдениеті туралы мағлұматтар жүйеленген. Ш.Уәлиханов пен Ы.Алтынсарин еңбектеріне де кең орын берілген. Мұражайда КСРО Ғылым академиясының Қазақ филиалына арналып жеке экспозиция ұйымдастырылды. Тағы бір экспозиция ҚазКСР Ғылым академиясының бірінші президенті, аты әлемге танымал ғалым Қ.И.Сәтбаевқа арналған. Сонымен қатар залда ҚазКСР Ғылым академиясының бірінші құрамына кірген 14 академик пен ҚазКСР Ғылым академиясының 16 корреспондент-мүшесі туралы деректер берілген. Ал, Сирек кездесетін кітаптар мұражайының негізгі міндеті – Қазақстанда және шетелдерде сақталған ел тарихына, мәдениетіне, ғылымына қатысты көне қолжазбалар мен сирек кездесетін кітаптарды бір орталыққа жинақтау, сақтау, зерттеу және дәріптеу; әртүрлі мәдени-тарихи жағдайлардағы олардың әлеуметтік рөлін, көне ғасырдан бері қалыптасқан отандық жазба мәдениетін жан-жақты көрсету. Мұражай қоры Орталық ғылыми кітапхананың көне қолжазбалар мен сирек кітаптар қоры негізінде жасақталды. Мұражай қорындағы XІII–XX ғғ. аралығындағы жазба мұралар таңдап алынып, «Ғасырлар қойнауындағы асыл мұралар» атты экспозиция жасақталды. Қолжазбалар қашанда елдің сан ғасырлық рухани, саяси өмірінен, мәдениеті мен тарихынан мол мәлімет беретін құнды жәдігер, ұлт мұрасы ретінде есептелген. Сондай құнды жәдігерлер қатарында мұражай экспозициясынан атақты шығыс шайырларының қазақ тілінде жырланған шығармаларын, Хакім Абайдың өлеңдер жинағын (М.Бікеұлының қолжазбасы), халық мұрасын жинаушы Мәшһүр Жүсіп Көпеевтің этнографиялық материалдарын қолжазба күйінде көруге болады. Шағатай тілінде жазылған «Хандар шежіресі» (XVIII ғ.), Түркістан шеберлерінің «насталик», «насх» жазу үлгілерінде жазған қолжазба Құрандары мұражай көрмесінен лайықты орнын алды. Жаяу Мұсаның 1911-1918 жылдары жазған күнделігі, Кенен Әзірбаевтың өз қолжазбасы, Шәкәрім шығармаларының (ұлы Ахат Құдайбердиевтің) қолжазбасы және Құнанбайдың Омбы кадет корпусында оқып жүрген ұлы Халиоллаға 1885 жылы жазған хаты мұражайдың құнды жәдігерлері. Табиғат мұражайы ҚР БҒМ Зоология институтының жетекші ғалымдарының бастамасымен және ҚР ҰҒА бірінші президенті, академик Қ.И.Сәтбаевтың тікелей қолдауымен ашылды. Елу жыл бойы мұражай өзінің ғылым- білім беру және табиғат қорғау бағыттарының арқасында тек республикада ғана емес елімізден тыс жерлерде кең танымал болды. Мұражайға қойылған экспонаттардың құндылығына баға жетпейді. Экспозицияда ұсынылған жәдігерлер біздің қоғамымыздың мәдениетін және әлеуетін көтеруде үлкен мәні бар біздің ұлттық байлығымыздың ажырамас бөлігі болып табылады. Мұражайдың негізгі мақсаты – ежелгі геологиялық дәуірден қазіргі күнге дейінгі Қазақстанның жануарлар әлемінің бай алуан түрлілігін көрсету. Сирек кездесетін жәдігерлердің қатарында қазіргі Батыс Қазақстан аумағында, шамамен 130-140 млн. жыл бұрын теңіз кеңістігінде тіршілік еткен теңіз алыбы плиозиозаврдың омыртқалары, тарбазавр қаңқасының көшірмесі, алып мүйізтұмсық – индрикотери қаңқасы, Торғай ойпатынан табылған олигоцен кезеңінің энтолодон қаңқасы; Ертіс өңірінен табылған алып мастодонттың тоқпан жілігі мен жақ сүйегі және тағы да басқа көптеген жәдігерлер бар. Бір сөзбен айтқанда, «Ғылым ордасының» мұражайлары жәдігерлерге бай. Сондықтан да болар мұнда келушілердің қарасы еш үзілген емес. Алтынай Әубәкірова, «Ғылым ордасы» Сирек кездесетін кітаптар мұражайының қызметкері
3988 рет
көрсетілді45
пікір