- Ақпарат
- 14 Маусым, 2012
«Жаңа әлемдегі Еуразиялық мәдениет»
Астанадағы Бейбітшілік және келісім сарайында 15 маусымда Достастық елдері арасындағы мәдени-гуманитарлық байланыстарды нығайту мақсатындағы «Жаңа әлемдегі Еуразиялық мәдениет» халықаралық форумы өтпек. Мәдениет және ақпарат министрлігі мен ТМД-ға мүше елдердің мемлекетаралық гуманитарлық ынтымақтастық қоры ұйымдастыратын форум екі күнге созылады. Форум жұмысына Мәдениет министрлері, ТМД елдерінің шығармашылық және гуманитарлық қауым өкілдері, ТМД мемлекетаралық гуманитарлық қорының басшылары, халықаралық ұйымдардың өкілдері мен басшылары, Парламент депутаттары, мемлекеттік органдардың, Достастық елдері дипломатиялық өкілдіктерінің басшылары, республикалық мәдениет мекемелерінің жетекшілері, сонымен қатар Қазақстан мәдениеті мен өнерінің көрнекті қайраткерлері қатысады. Шараға қатысатын тұлғалар мемлекет басшыларына, ТМД-ға мүше елдердің ғылыми, шығармашылық адамдарына Үндеу арнамақ. Шара «Қазақстан» Орталық концерт залында өтетін гала-концертпен, ТМД елдері жетекші би ұжымдары фестивалімен қорытындыланады. Маусымның 15-і күнгі бағдарлама бойынша ТМД-ға мүше елдердің биі мен музыкалық өнерінің ең таңдаулы үлгілері орындалып, Қазақстанның халық артисі Роза Рымбаева, Пятницкий атындағы Мемлекеттік академиялық орыстың халық хоры, Вирский атындағы Украина ұлттық академиялық би ансамблі, Тәжікстанның мемлекеттік «Лола» би ансамблі, Молдованың ұлттық «Флуераш» халықтық ән-би ансамблі, Әзірбайжанның «Джанги» мемлекеттік эстрадалық-фольклорлық ансамблі, Беларусь мемлекеттік академиялық «Хорошки» ансамблі, Алия Шалхарованың «Офарин» би театры, Қырғызстанның халық артисі Роза Аманова, Алты Пурмамедов жетекшілік ететін ұлттық трио, халықаралық байқаулардың лауреаты Арминэ Саркисян, «Тұран» фольклорлық-этнографиялық ансамблі, Қарақат Әбілдина және балалар ансамблі, Қазақ ұлттық өнер университетінің домбырашылар ансамблі және басқалар өнер көрсетеді. Маусымның 16-сы күнгі халық биі фестивалінде жоғарыда аталған ұжымдармен бірге, «Ялла» ансамблінің, «Кешью» және «Орда» топтарының өнер көрсетуі жоспарланып отыр.
Фатима БАЙЧИМИРОВА2770 рет
көрсетілді0
пікір