- Қоғам
- 16 Тамыз, 2012
Дархан Мыңбай: Еңбек – адам бойындағы толайым рухтың көрсеткіші
Таяуда Мәдениет және ақпарат министрлігінде министр Дархан Мыңбайдың төрағалығымен республикалық және жергілікті БАҚ-тардың және үкіметтік емес ұйымдар басшыларының қатысуымен алқалы жиын болып өтті. Жиынға Еңбек және халықты әлеуметтік қорғау, Білім және ғылым министрліктерінің өкілдері қатысты. Басқосу Елбасы Нұрсұлтан Назарбаевтың «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» атты мақаласына, ондағы айтылған нақты тапсырмаларды жүзеге асыруға арналды. Сөз басында Елбасының Қазақстан жұртшылығына арнаған бағдарламалық мақаласы халық тарапынан кең қолдау тауып жатқанын атап өткен министр Дархан Мыңбай мәселеге орай мазмұнды баяндама жасады. «Жаһандық тұрақсыздық жағдайында Қазақстан қоғамы қандай болуы керек, біздің игерілмеген қорларымыз бен мүмкіндіктеріміз қандай, сондай-ақ тағы да не жасауға болады деген сұрақтарға жауап іздеу барысында және әлеуметтік саясат нық әрі жасампаз болуы үшін Елбасымыз Жалпыға Ортақ Еңбек Қоғамына өту идеясын ұсынды. Бұл ретте Президент масылдық психология, аз жұмыс істеп, көп ақша табу һәм ауадан ақша жасауға қатысты өткір ойларын ортаға салды. Жалпы бұл психологияға әділдікке негізделген шынайы еңбек қана қарсы тұратынын ескерсек, қоғам мүшелерінің еңбек сіңіруінен бастап оның марапатқа жетуіне дейінгі жолы ел алдында өтуі тиіс. Әділ еңбек адам бойындағы толайым рухтың көрсеткіші. Дәл сондай рух қана ерік, жігерді тәрбиелеп, күшті жанып, отаншылдық сезімін қалыптастырады. Біз бұған мысалды алыстан іздеп жатпаймыз. Кешегі Лондон олимпиадасындағы қыз-жігіттердің ерлігі, еңбегі елге үлгі етуге тұрарлықтай» деген министр әрі қарай отандық бұқаралық ақпарат құралдарын жаңғырту мәселесіне назар аударды. Дархан Қамзабекұлы отандық БАҚ Елбасы мақаласындағы әрбір тақырыпты ашып көрсетуі керектігін баса айтты. «Елбасының Үкіметке 2013 жылдың 1-ші сәуіріне дейін Қазақстан Республикасын әлеуметтік дамытудың Жалпыұлттық тұжырымдамасын жасауды тапсырғаны белгілі. Мұнда әлеуметтік заңнамаларды жаңарту, әлеуметтік-еңбек қатынастарының тиімді моделдерін, өмір сапасының қазақстандық үлгісін қалыптастыру, әлеуметтік жаңғыртудың ақпараттық-мәдени құрамдасын дамыту және әлеуметтік үдерістерді мемлекеттік басқарудың тиімді жүйесін жасау бағыттары қамтылған. Осы бағыттардың арасында бізге қатыстысы ақпараттық-мәдени құрамдас дейтін болсақ, бұл орайда, Үкіметке «Ақпараттық Қазақстан» мемлекеттік бағдарламасын жасап шығу жүктелді. Мемлекет басшысы БАҚ қызметі Журналистік этика кодексінің нақты стандарттарына негізделуі тиіс екендігін қадап айтты. Сондай-ақ біздің министрлікке журналистердің қоғамдық бірлестіктерімен бірге Журналист этикасының жаңа кодексін дайындау тапсырылды» деген Дархан Мыңбай қазіргі таңда Қазақстан Журналистер одағы мен еліміздегі бас редакторлар клубы бұл құжаттың негізгі параметрлерін талқылауға кірісіп кеткенін және журналистердің өзі жасаған бұл Кодекстің ақпарат алаңында әділ бәсекелестік тудырып, журналистің өзін-өзі кәсіби тұрғыда реттеп отыруға көмектесетінін айтты. Министрмен кездесу барысында халық арасында ақпаратты-түсіндіру жұмыстарын ұйымдастыру мәселелері де сөз болды. «Мақала жарияланғалы бері бір ай өтті. Бұқаралық ақпарат құралдарында азаматтар үн қосуда, арнайы айдарлар бойынша мақалалар жариялануда, телеарналарда бағдарламалар беріліп жатыр. Әйтсе де, біз бұған қатысты ақпараттық жұмысты нақты жүйелеп алуымыз керек. Осыған орай Президент Әкімшілігі Мемлекеттік хатшының қаулысымен бекітілген Ақпараттық-түсіндіру жұмыстары бойынша іс-шаралардың арнайы жоспарын дайындады. Сіздерді солардың бірқатарымен таныстырып өтейін» деген министр «Хабар» және «Қазақстан» мемлекеттік телеарналарында жыл соңына дейін «Жалпыға Ортақ Еңбек Қоғамына қарай 20 қадам» құжаты негізінде роликтер мен журналдар дайындап, оларды эфирден өткізу барысында екі ай сайын жаңартып отыру қажеттігін еске салды. Кездесуде БАҚ басшылары министр тарапынан Олимпиада чемпиондарын өз дәрежесінде насихаттай білу, 27-29 тамызда өтетін халықаралық конференцияны кең тұрғыда көрсету, Конституция күніне орай өтетін халықаралық конференцияның мақсаты мен мәнін халыққа жеткізу жөнінде тапсырмалар алды. Министрліктің кеңейтілген отырысына қатысқан Еңбек және халықты әлеуметтік қорғау вице-министрі С.Ахметов, Білім және ғылым вице-министрі М.Сарыбеков және БАҚ басшылары Елбасының мақаласына орай өз ойларын ортаға салды. Дәуіржан Төлебаев
2931 рет
көрсетілді0
пікір