- Ақпарат
- 05 Қыркүйек, 2012
«Теңізшевройл»: жартыжылдық қорытындысы
2012 жылдың бірінші жартысында «Теңізшевройл» қазақстандық тауарлар мен қызметтерді пайдалануға 805 миллион АҚШ доллары шамасында қаржы жұмсады. 1993 жылдан бастап қазақстандық қамтушылардың 12,1 миллиард АҚШ долларын құрайтын тауарлары мен қызметтерін пайдаланды. Өткен жылы ТШО қазақстандық тауарлар мен қызметтерге 1,6 миллиард АҚШ долларын жұмсаған болатын. 2000 жылдан бері «Теңізшевройл» қоршаған ортаға әсерді азайтуға бағытталған жобаларға 2,41 миллиард АҚШ доллары көлемінде қаржы бөлді. Қоршаған ортаны қорғауға жұмсалған бұл инвестициялар алауларда жағылатын газдың жалпы көлемін 2000 жылдан 94%-ға азайтуға мүмкіндік берді. 2000 жылдан бері өндірілген мұнайдың бір тоннасына шаққандағы атмосфераға жіберілген шығарындылардың көлемі 73%-ға азайды. Өткен жылы атмосфераға жіберілген шығарындылардың көлемі ТШО өндірген мұнайдың бір тоннасына шаққанда, орта есеппен 2,28 килограмды құраған еді. Компания бойынша 2000 жылдан бері бір жылдық мұнай өндіру көлемі 16%-ға өсіп отыр. ТШО-да жұмыс жасайтын қазақстандық қызметкерлердің үлесі де жылдан-жылға өсіп келеді. 1993 жылғы 50% көрсеткішпен салыстырғанда қазір бұл 85% құрап отыр. Жергілікті ұлттық басшылардың, орта буын жетекшілерінің үлесі жалпы басшылық құрамның 76%-ын құрайды. Кадрларды оқыту және шыңдау жөніндегі тұрақты бағдарламаны жүзеге асыру нәтижесінде жауапты басшылық лауазымдарға тағайындалған жергілікті қызметкерлер қатары көбейе түсуде. Әлеуметтік салаға келетін болсақ, 1993 жылдан бастап ТШО өз қызметкерлері мен жергілікті тұрғындардың игілігі үшін Атырау облысының әртүрлі әлеуметтік жобаларына 750 миллион АҚШ долларынан астам қаржы жұмсады. 2011 жылы «Игілік» бағдарламасына 20 миллион АҚШ доллары көлемінде қаржы бөлінді. Оның едәуір бөлігі Құлсары қаласының сумен жабдықтау жүйесін қайта жүргізуге жұмсалды. Жалпы құны 60 миллион АҚШ долларын құрайтын Құлсары қаласының сумен жабдықтау жүйесін қайта жүргізу жобасының құрылысын одан әрі жалғастыру үшін 2012 жылы «Игілік» бағдарламасына тағы 20 миллион АҚШ доллары көлемінде қаржы бөлінді. Аталмыш қаржының негізгі үлесі Құлсары қаласының сумен жабдықтау жүйесін жаңарту жобасына жұмсалуда. Әсел ӘЛІМ
2649 рет
көрсетілді0
пікір