- Ақпарат
- 22 Желтоқсан, 2012
Алматы – Тәуелсіздігіміздің алтын бесігі
Алматы қаласындағы Республика сарайында еліміздің Тәуелсіздік күніне арналған салтанатты жиын өтті. Қала әкімі Ахметжан Есімов жиналған жұртшылықты мерекемен құттықтап, сөз сөйледі. – Біздің терең тарихымыз шежірелі күндерге толы. Сол күндердің барлығы бір-ақ арнаға тоғысады, ол – азаттық, еркіндік, тәуелсіздік. Осыдан 21 жыл бұрын ел болып, халық болып сол ұлы мұратқа қол жеткіздік. Тәуелсіздік деген қасиетті ұғымның астарында халқымыздың арман-тілегі, ұлы мақсат-мұраттары, қажырлы еңбегі мен ержүрек каһармандығы жатыр. Біз Тәуелсіздік туы алғаш рет Алматыда желбірегенін әрдайым мақтанышпен айтамыз. Оны Елбасымыз «Алматы – Тәуелсіздігіміздің алтын бесігі» деп айрықша атап көрсеткен болатын. Тәуелсіздігімізді осы деңгейге жеткізу жолында қаншама тар жол, тайғақ кешуден өттік. Сол ауыртпалықтарды жеңе білген қаһарман азаматтарға ерен еңбектері үшін алғыс айтамын. Өткен жылы Тәуелсіздіктің 20 жылдығын зор жетістіктермен қарсы алсақ, бүгінде халқымыздың ахуалы айтарлықтай жақсарып келеді. Осы орайда, Алматы қаласының алатын орны айрықша. Сонау тоталитарлық кезеңнің өзінде-ақ азаттықтың ақ туын көтерген желтоқсандық жастардың екпіні, кешегі қиын-қыспақ кезеңде тура жол тапқан Елбасы мен зиялы қауымның еңбегі, бәрі де осы киелі жерден басталды. Әр халықтың тарихында өзінің ұлттық ар-намысын қорғап қалуға, егемен ел болуға лайықты екендігін көрсететін сын сағаттар болады. Біздің тарихымыздың бір көрінісі – 1986 жылғы Желтоқсан көтерілісі. Бүгінде желтоқсандықтар қаламыздың әлеуметтік-экономикалық дамуына үлес қосып, жас ұрпаққа үлгі-өнеге болып жүр. Біз Желтоқсан ұйымдары мүшелерімен бірге атқарылып келе жатқан игі шараларды одан әрі жалғастыра беретін боламыз, – дей келе, әкім Алматы қаласының Тәуелсіздік жылдарындағы жетістіктеріне тоқталды. Қала әкімінің сөзінен соң жиын мерекелік концертке ұласты. Н.Жандәулетұлы
3494 рет
көрсетілді0
пікір