• Руханият
• 17 Қаңтар, 2013

Елге сіңірілген елеулі еңбек

Алматыда қазақ халқының дара тұлғасы, мемлекет және қоғам қайраткері үш мәрте Социалистік Еңбек Ері Дінмұхамед Қонаевқа арналған шара өтті. Шараға Д.А.Қонаевтың қызметтес ізбасарлары, мемлекет және қоғам қайраткерлері, соғыс пен еңбек ардагерлері қатысты. Салтанатты шараға қатысушылар Д.А.Қонаев мұражайының жаңадан жабдықталған экспозициялық залдарында, сондай-ақ М.Төлебаев көшесіндегі №119 үйде орналасқан «Д.А.Қонаев мемориалдық пәтер-мұражайында» болды. Қала тұрғындары экскурсия жүргізушілердің көмегімен ондағы алуан түрлі жәдігерлермен танысты. 

– Мемориалдық пәтер-мұражай былтыр мемлекет және қоғам қайраткері, Алаштың ардақты азаматы Д.А.Қонаевтың 100 жылдық мерейтойының аясында ашылды, – деді Д.А.Қонаев мұражайының директоры Темір Жұман. – Бүгінде мұражайға айналған үйде Дінмұхамед Қонаев өз отбасымен бірге 1967 жылдан 1993 жылға дейін тұрған. Мемориалдық пәтер мұражайда арыс азаматтың өз қолымен ұстаған дүниелері, бұған дейін көпшілік көрмеген 700-ге жуық оттық, қару-жарақ коллекциялары, 5000-нан асатын кітаптар, сондай-ақ әртүрлі мемлекет басшылары мен достары сыйлаған сыйлықтары мен құнды жәдігерлер қойылып отыр. Өткен өмірі қаншалықты күрделі де қарама-қайшылықта болғанымен Дінмұхамед Ахметұлы экономиканы, әлеуметтік саланы, ғылымды, ұлттық мәдениетті дамыту ісінде Қазақстанның көп ұлтты халқының   алдында зор еңбек сіңірді. Ол үш мәрте Социалистік Еңбек Ері атағын алып, сегіз рет Ленин орденінің және басқа да еліміз бен шет мемлекеттердің ордендері мен медальдарының иегері болды. Ол еліміздің партия және шаруашылық жұмыстарымен өзінің ғылыми еңбектерін ұштастыра білді, 100-ден аса ғылыми еңбектері жарық көрген болатын.