- Ақпарат
- 24 Қаңтар, 2013
Сақтана білгеніміз жөн
«Көктегі күзет» атты орталықтың болжамдарын көлденең тартып, табиғат жанашыры, белгілі эколог Мэлс Елеусізовтің «күшті зілзалалар толқыны жақындап қалды, жойқын зілзаладан бас сауғалау үшін әр үйде бункер салу керек. «Көктегі күзет» деп аталатын халықаралық ұйым жер сілкінісі жиі болатын 13 мемлекетті анықтапты. Сол тізімнің ішінде Қазақстан 4-ші орында көрінеді» деген мәлімдемесін естіген жұрт қатты дүрлігіп еді. Осыған орай, Алматы шаһарындағы Сейсмология институты мен Төтенше жағдайлар департаменті брифинг өткізді. Мамандардың айтуынша, осы жылдың мамыр-маусым айларында және күзде Алматы облысында күші 7 балға дейін жететін жойқын сілкіністер болмайды. Департаменттiң мәлiметiнше, iрi жер сiлкiнiсi бола қалса, бiрден iске қосылатын әрекет ету жоспарлары бар екен.
Сейсмология институтының директоры, техника ғылымдарының докторы, академик, ЮНЕСКО-ның жер сілкінісі жөніндегі сарапшысы Таңатқан Абақанов алдағы уақытта үй қирап, адамның өміріне зақым келетіндей күшті жер сілкіністері болмайтындығын тілге тиек етті.
Алдағы уақыттарда аймақтың сейсмикалық мәселесiне қатысты зерттеу, бақылау жұмыстары жалғаса беретін көрінеді. Осыған орай жылдың ортасында арнайы мамандармен жүргiзiлген жұмыстардың қорытындысы жарияланбақшы. Республикамыз бойынша ең қауіпті сейсмикалық аймақтар қатарына Алматы, Алматы облысы, Шығыс Қазақстан облысы мен Батыс Қазақстан өңірлері еніп отыр. Жалпы, мұндай аймақтарда құрылыс сейсмикалық картасыз жүргізілмеуі тиіс. Себебі сол құжатта жердің қандай күшке төтеп бере алатыны көрсетіледі. Яғни сейсмотұрақтылық толықтай зерттеледі. Қазіргі таңда Алматының сейсмикалық картасын жасау үшін қыруар қаржы қажет. Қала аумағының ұлғаюына байланысты картаны дайындау мерзімі де ұзартылады. Егер тиісті қаржы мемлекет тарапынан бөлініп жатса, сейсмикалық карта 2015 жылы дайын болмақ. Бүкіл Қазақстан Республикасы аумағының жалпы сейсмикалық картасын құрастырудың маңызы зор. Өйткені бүгінгі пайдаланып жүрген карта кеңес дәуіріндегі ескі әдістемелермен жасалған екен. Ол кезде еліміздің аумағында толық зерттеулер де жүргізілмеген. Соңғы кезде мұнай-газ, тау-кен өндірістерінің дамуына байланысты Қазақстандағы сейсмикалық қауіп те өрби түсуде.
Сондай-ақ Орталық және Орта Азияның, ТМД елдерінің және алыс шетелдердің ғалымдары мен инженерлерінің тәжірибелерімен бөлісу ауадай қажет. Алдағы уақытта сейсмикаға төзімді құрылыс секторларын дамыту және ары қарай жетілдіру үшін өзге елдердің озық идеялары мен инновациялық технологияларының жайын талқылау үшін ғылыми-тәжірибелік отырыстар жиі ұйымдастырылып тұрмақ. Өйткені Қазақстанда бұл мәселеге көңіл бөлінбей отырған көрінеді. Сонымен қатар мамандар Алматы мен Алматы облысы, Жамбыл өңірлеріндегі жүргізіліп жатқан құрылыс жұмыстарына да алаңдаушылық танытуда. Өйткені бұл салада стандарттарға толықтай сәйкес келмейтін қытайлық құрылыс материалдарын пайдалану артқан. Құрылыс саласының мамандары жекеменшік тұрғын үйлер мен ойын-сауық және сауда орталықтарын, мешіттерді, сонымен қатар стратегиялық нысандарды да қатаң бақылау керек деген тоқтамға келді. Оның ішінде мұнай және газ комплекстері, гидротехникалық және тау-кен өндіруші, сондай-ақ атомдық нысандар бар. Біздің елде тұрғын үй құрылысын көптеген шетелдік компаниялар жүргізіп отырғанына көпшіліктің алаңдаушылық білдіретіні тегін емес. Мәселен, түріктердің аз уақыттың ішінде көпқабатты үйлерді тұрғызып, пайдалануға беруі халық арасында күмән тудырады. Өйткені Түркияда болған жеті балдық жер сілкінісінің салдарынан ғимараттар қирап, адам шығыны болды емес пе?! Мәселен, елімізде жылына 8000-ға жуық төмен балды жер сілкіністері есепке алынса, тек қана былтырғы жылдың 15-сәуiрінен 2013 жылдың 15-қаңтарына дейiнгi уақыт аралығында Алматының айналасында және таяудағы көршi елдерде 3-4 балдық жер сiлкiнiсiнiң 10-ы тiркелiптi. Олай болса, жер қыртыстарының өзгеруіне байланысты болып тұратын жердің сiлкiнулеріне бола даурығудың қажеті жоқ. Алайда сақтана білгеніміз жөн. Тіптен технологиясы қарыштап дамып кеткен жапондардың өзi зiлзаланың қашан боларын нақты бiлмейдi ғой. Бір сөзбен айтқанда, қауіптің қашан және қандай жағдайда келетіні бір Аллаға ғана аян. Сондықтан да әрдайым не нәрсеге болса да дайын отырудың маңызы зор. Болашаққа болжам жасап босқа даурығу ешкімге бедел әкелмесі анық.
Салтанат ҚАЖЫКЕН
2988 рет
көрсетілді0
пікір