- Мәдениет
- 24 Қаңтар, 2013
Жарайсың, Головкин!
Қазақстандық былғары қолғап шебері «WBA» (Бүкіләлемдік бокс ассоциациясы) мен «IBO» (Халықаралық боксшылар ұйымы) чемпионы Геннадий Головкин АҚШ-тың «Мэдисон Сквер Гарден» стадионында америкалық боксшы Габриель Росадомен қолғап түйістірді.
Жекпе-жектің алдында мамандар америкалық Росадо қазақстандық Головкинге қарсы тұра алуға шамасы келеді деп болжаған еді. Себебі ол өзінің соңғы жеті кездесуін нокаутпен жеңген мықтылардың бірі болатын. Ол кездесу алдындағы сұхбаттарының бірінде Головкиннің жойқын соққыларына төтеп беріп, қарсыласын сегізінші-тоғызыншы раундтардың бірінде сұлатып салатындығын мәлімдеді. Ал Головкин оған қарсы берген уәжінде Росадоның шынымен де мықты боксшы екендігін айтып, бірақ ең алдымен оған сегізінші-тоғызыншы раундқа дейін жетудің өзі оңайға түспес деген ойын білдірді. Жерлесіміздің осы айтқаны дәл келді. Росадо бірінші раундтың өзінде-ақ көптеген қателіктер жіберді. Қорғаныс тактикасын қалап алған америкалық боксшы жерлесіміздің осал жерін іздеумен болды. Алайда қазақстандық былғары қолғап шебері шабуылдап жүріп, қорғанысты да ұмытпады. Екінші раундта Головкиннің шалт соққысынан Росадоның қабағы жарылып кетті. Осы жарылған қабақ үшінші-төртінші раундтардағы жаңа соққылардан одан әрі ашылып, Росадоның тұла бойын қан жуып кетті.
Әрі қарай Головкин тәжірибелі боксшы екендігін дәлелдеумен болды. Жетінші раундқа жеткенде оның соққылары тіптен үдеп кетті. Ол енді Росадоны қуалап жүріп сабауға айналды. Мұнан әрі Росадода Головкинге қарсы күресер амал қалмады. Оның көп ұзамай қатты соққыға ұшырайтындығын түсінген жаттықтырушылары рингке ақ орамал лақтырып, жеңілгендіктерін мойындап, ойынды тоқтатуға мәжбүр болды.
Бұл кәсіпқой бокста әлі бірде-бір рет жеңіліп көрмеген Геннадийдің жиырма бесінші жеңісі. Соның жиырма үшін ол нокаутпен жеңіп отыр. Тамаша табыс. Осылайша ол орта салмақта өзіне еншілі «WBA»-ның чемпионы деген атағын қорғап қалды. Кәсіпқой боксқа 2006 жылы жол тартқан Г.Головкин 100 пайыздық көрсеткішпен бүкіл қазақстандық жанкүйерлерді қуантып келеді.
Салтанат ҚАЖЫКЕН
2759 рет
көрсетілді0
пікір