• Ақпарат
• 07 Наурыз, 2013

Жыр алыбы – Жамбыл

28-ақпан – жыр алыбы атанған Жамбыл бабамыздың туған күні. Бүгінде өскелең ұрпақты сөз мәйегін кие тұтқан Жамбыл бабамыздың шығармаларымен сусындату, мол мұрасын насихаттау жан-жақты жүргізіліп келеді. «Ақындықты айт, ерлікті айт, батырлықты айт, Ер бірлігін сақтаған татулықты айт» деп кестелі сөзден өлең өрнектеген өз заманының жарқын жыршысы Жамбыл Жабаевтың туғанына биыл 167 жыл толып отыр. Осыған орай Алматы облысына қарасты Жамбыл ауданының Жамбыл ауылында дәстүрлі «Жамбыл күні» аталып өтті. Мерекелік жиынға еліміздің түкпір-түкпірінен ақын-жазушылар, жамбылтанушы ғалымдар, зиялы қауым өкілдері және аудан жұртшылығы қатысты. Жиылған қауым алдымен ақын рухына Құран бағыштап, ескерткішіне гүл шоқтарын қойды. Жамбыл ауылының Мәдениет үйінде өткен салтанатты жиында Алматы облысының әкімі Аңсар Мұсаханов сөз сөйлеп, абыз бабамыздың рухани бай мұрасы халқымыздың асыл қазынасы екенін атап өтті. Ұлы ақынның туған күніне орай осынау дәстүрлі «Жамбыл күні» облыс аумағында кеңінен аталып өтетінін тілге тиек етті. Орайы келгенде Жамбыл атамыздың 88 жастағы немересі Әлімқұл ақсақалға құндыз шапан кигізіп, бұқараның қошеметіне бөленді. Облыс әкімі жиынды ашып берген соң, Қазақстан Жазушылар Одағы басқармасы төрағасының бірінші орынбасары, белгілі ақын Ғалым Жайлыбай мінберге шығып, ақын мұрасы хақында өз пікірін білдірді. Одан кейін сахнаға халықаралық Алаш сыйлығының иегері, жазушы Нағашыбек Қапалбекұлы шығып, ұлы жыраудың шығармашылығына қатысты жаңа деректер табылып жатқанын атап өтті. Нағашыбек Қапалбекұлының айтуынша, бүгінде елімізде жамбылтану бағытында ғылыми-танымдық зерттеу жұмыстары жүріп жатқан көрінеді. Атап айтсақ, Абай атындағы Қазақ ұлттық педагогикалық университетінің ректоры Серік Пірәлиевтің мұрындық болуымен «Жамбылтану» орталығы құрылған екен. Сонымен қатар, М.Әуезов атындағы Әдебиет және өнер институтында «Жамбыл» атты энциклопедия дайындалуда. Өз кезегінде белгілі ақын Рафаэль Ниязбек және танымал тележурналист Нұртілеу Иманғалиұлы болса суырып салма өнердің майталманы, от тілді, орақ ауызды ділмәр ақынның өнегелі өмірі мен жырларына тоқталып өтті. Кеш соңы «Құлансаз» фольклорлық-этно­графиялық ансаблінің концертіне ұласты. Нұргүл ҚАБДЫРЕЙМ