- Ақпарат
- 20 Наурыз, 2013
Тасқынға – тосқын!
Еліміздің әр өңірінде ауа райы жылынып, қалыңдаған қардың енді күрт еруі өз әлегін алып келді.
«Казгидромет» мемлекеттік мекемесі Шығыс Қазақстан облысының басым бөлігінде қатты жел соғып, жаңбыр толассыз жауып, күннің күрт жылынуынан тау беткейлерінен су тасқыны болатыны жайлы хабар таратып, тұрғындарды қауіпсіздік шараларын сақтауға шақырды. Шығыс Қазақстан облысының орталығы Өскеменнің өзінде қардың 70 пайызға жуығы еріп кетті. Ал Сөгір кенті маңында бірнеше тұрғын үйді су басты. Оның зардабы дер кезінде жойылды. Облыс басшысы Б.Сапарбаев арнайы қызмет мекемелері басшыларымен бірге облыстың қауіпті әрі таулы аймақтары Зырян, Катонқарағай аудандарында болып, су басу қаупі жоғары жерлерді аралап, жағдаймен танысты. Катонқарағай ауданының әкімі Арман Бекбосыновтың хабарлауынша, су тасқынынан өңір тұрғындары аман-есен, мал шығыны жоқ. Жергілікті әкімдік тұрғындарға көмек көрсетіп, қар суының арнасын бұрып, қауіпті жерлерге бөгеттер орнатуда.
Қарағанды өңірінде толассыз жауған жаңбыр мен қардың еруінен жүздеген жекеменшік үйді су басты. Өңірдің Майқұдық, Пришахтинск, Михайловка аудандарындағы 40-тан астам жер үй су астында қалды. Қазір әр ауылда әкімдердің басқаруымен арнайы штабтар құрылды. Құтқарушылар қазір тұрғындарды қауіпсіз аймақтарға көшіріп, жиналған суды сыртқа шығарумен айналысуда.
С.ЖАСБАТЫРҚЫЗЫ
2896 рет
көрсетілді0
пікір