- Ақпарат
- 28 Наурыз, 2013
Гүлдер көрмесі өтті
Қ.И.Сәтбаев атындағы Қазақ ұлттық техникалық университетінде Ұлыстың Ұлы күні – Наурыз мерекесіне орай рухани шара болып өтті.
Шараның ашылу салтанатында қаладағы 11 этноорталықтың өкілдері бірігіп көрермендерге театрландырылған қойылымды көрсетті. Аталмыш университеттің ректоры Жексенбек Әділов жиналғандарды Наурыз мерекесімен құттықтады. Белгілі әнші, Қазақстан Республикасының халық артисі Нұрғали Нүсіпжанов жиналған жұртқа ақ тілегін айтып, «Армандастар» әнін орындады. Содан кейін университеттің басшысы әншіге зор денсаулық тілеп, иығына шапан жапты. Алматы қаласындағы Бостандық ауданының әкімі Раушан Асанова, Қазақ ұлттық техникалық университетінің тәрбие жұмыстары жөніндегі проректоры Гүлнар Сәрсенбекова өздерінің құттықтау сөздерінде Наурыз мерекесінің мәні мен маңызына тоқталды. Мерекелік шара барысында шахматтан, тоғызқұмалақтан және кір тасын көтеруден жарыстар өтті. Ойлылар ойыны болып саналатын шахмат жарысында осы оқу орнының профессоры Тұрарбек Бегімовке тең келер ешкім болмады. Ал дарынды жастар болса қағаздан түрлі-түсті гүлдер жасап, «Гүлдер аллеясы» деп аталатын көрме өткізді. Сонымен қоса шараға келген қонақтар наурызкөже мен бауырсақтан дәм татты. Биылғы оқу жылы Қ.И.Сәтбаев атындағы ҚазҰТУ студенттері үшін жақсылыққа толы болды. Жыл басынан бері оқу орнында көптеген іс-шара өтті. Сол атқарылған игілікті істердің барлығы да университеттің тәрбие жұмысы жөніндегі проректоры Г.Сәрсенбекованың тікелей басқаруымен жүзеге асты.
Нұрлан ҚҰМАР
4687 рет
көрсетілді1
пікір