• Ақпарат
• 09 Маусым, 2010

200 отбасы баспаналы болды

Қызылағашта алғашқы үйдің іргетасы 19 наурыз күні қаланған болатын. Ал мамырдың 20-сына дейін 145 үй­дің кілті тапсырылды. Міне, енді тағы 200 отбасы осындай шаттыққа кенел­ді. Сөйтіп, бүгінгі күнге жалпы саны 345 үй пайдалануға беріліп отыр. Бар­лық үйлер қажетті ыдыс-аяқпен, төсек жаб­дықтарымен, мүліктермен қам­тамасыз етілді.  Ақсулықтарға үй кілттерін тапсырған облыс әкімі С.Үмбетов: – Қазақ «Ауыл – алтын бесік» деп бекер айтпаған. Ауыл – қазақтың берекесі. Жаңарған ауыл, қайта бой түзеген баспаналарыңыз құтты болсын. Ел іргесі аман болып, ырыс-құт арылмасын! – деген ізгі тілегін білдірді. Жаңа қоныс иелері атынан сөз алған Сайлаубек Сағымбекұлы, Василий Галушенко, Дубек Мұсанов, Нұрлан Домақов құрылысшыларға ризашылықтарын жет­кізді. Елді мекенде су құбырын жүргізу жұмыстары аяқталды. Әрбір көшеде құ­дықтар орнатылып, тұрғындар ауызсумен қамтамасыз етілді. Жарық, телефон бай­ланысы қалпына келтіріліп, ауылдың ішкі жолдары жөнделіп, жаңадан асфальт төселуде. Көшелердің бойына отырғызылған ағаштарды суару үшін арық жүйесі жасалды. Елді мекеннің шығысындағы шеткі көшенің маңында жаңа саябақ бой көтеріп, онда бүгінгі күнге 15 мың түп терек, қарағаш, қайың, емен, т.б. ағаштар отырғызылды. Сағыныш Намазшамова Алматы облысы