- Ақпарат
- 09 Маусым, 2010
Азия Кеңесінің беделі артып келеді
Ыстамбұл қаласында Азиядағы өзара іс-қимыл және сенім шаралары жөніндегі кеңестің (АӨСШК) ІІІ саммиті ашылды. Оның жұмысына АӨСШК-ге мүше бірқатар мемлекеттердің басшылары: Қазақстан Республикасының Президенті Нұрсұлтан Назарбаев, Түркия Президенті Абдулла Гүл, Ауғанстан Президенті Хамид Карзай, Әзірбайжан Президенті Ильхам Әлиев, Иран Президенті Махмұд Ахмадинежад, Моңғолия Президенті Цахиаийн Элбэгдорж және Ресей Үкіметінің Төрағасы Владимир Путин, сондай-ақ ҚХР Мемлекеттік Кеңесінің мүшесі, вице-премьер Дай Бинго, Ирак вице-президенті Т.Әл-Хашими, Вьетнам вице-президенті Нгуен Тхи Зоан, Тәжікстан Оли Маджилисінің төрағасы Ш.Зухуров, Біріккен Араб Әмірліктерінің Сыртқы істер министрі Шейх Бен Занд Абдалла әл Нахаян қатысты. АӨСШК-нің бұл саммитіне Украина Президенті В.Янукович байқаушы ретінде, Македония Президенті Г.Иванов қонақ ретінде арнайы келді. АӨСШК осыдан он сегіз жыл бұрын Қазақстан Президентінің бастамасымен өмірге келген еді. Қазіргі таңда бұл ұйым әлемдік қауымдастықтың назарында. Саммиттің ашылуында Қазақстан Республикасының Президенті, АӨСШК-нің қазіргі төрағасы Нұрсұлтан Назарбаев пен Түрік Республикасының Президенті Абдулла Гүл сөз сөйледі. Н.Назарбаев өз сөзінде Азия Кеңесі қауіпсіздік пен тұрақтылықты нығайту мәселесі бойынша беделі форумға айналып келе жатқанына тоқталды. Бір айта кетер жайт, форум аясында бірқатар маңызды құжаттар қабылданды. Олардың қатарында қағидаттар декларациясы, Алматы актісі, сенім шаралары тізілімдемесі, Рәсімдер ережелері, Артықшылықтар мен иммунитеттер конвенциясы бар. Сонымен қатар осы уақыт аралығында екі саммит, министрлер деңгейінде үш кездесу өтті. Халықаралық және өңірлік ұйымдармен байланыс жүзеге асырылды. Қазақстан басшысы бұл басқосуда форумның дүниежүзінде бедел алып отырғанына байланысты Азия Кеңесі хатшылығы басшысының мәртебесін Атқарушы директор деңгейінен Бас хатшы деңгейіне көтеру туралы ұсыныс жасады. Н.Назарбаев саммитте Қазақстан Азия Кеңесіндегі өзінің төрағалық міндетін Түркияға тапсырғалы отырғанын айтты. Түркия бұл абыройлы міндетті ойдағыдай орындайтынына сенім білдірді. Сөз сөйлеген Түркия Президенті Абдулла Гүл болса жиналғандарға алғыс айта келіп, АӨСШК-нің бүгінгі күні тек қана Азияда емес, бүкіл әлемде өз орны бар екенін атап көрсетті. Сонымен бірге ол АӨСШК төрағалығы Түрік Республикасына тапсырылып отырылғаны маңызды оқиға екенін тілге тиек етті. Қазақстан Республикасының Президенті Н.Назарбаев АӨСШК аясында бірқатар екіжақты кездесулер өткізді. С.Әлімұлы
2787 рет
көрсетілді0
пікір