- Ақпарат
- 26 Тамыз, 2010
Бұл шерудің ерекшелігі мол
Конституцияның 15 жылдығына орай 30 тамызда Астанада «Қазақ елі» монументінің жанында өтетін әскери шерудің өз ерекшеліктері болайын деп тұр. Солардың бірі – оған «Жас ұлан» кадетшілерінің-барабаншылардың қатысатындығы. Олар шеруді ашады. Екінші бір ерекшелік – әскери шеруге әйел әскери қызметшілер қатысады.
«Біз қазір де бұл шеруге дайынбыз, – дейді осы салтанатты шеруді өткізу жүктелген еліміз Қарулы Күштері Құрлық әскерлерінің бас қолбасшысы, генерал-майор Мұрат Майкеев. – Жеке құрам толқу үстінде. Себебі өзіміздің Жоғарғы Бас Қолбасшыны мінбеден көру, әсем Астананы тамашалау және осы мерейтойлық шерудің тікелей қатысушысы болу – үлкен құрмет». Бас алаңдағы әскери сапта 2400-ден астам жауынгер өтеді. Олар – еліміздің Құрлық әскерлері, Әуе қорғанысы күштері және Әскери-теңіз күштері бөлімшелерінің, сондай-ақ ІІМ, ҰҚК, ТЖМ және Республикалық ұлан бөлімшелерінің өкілдері. Олардың соңынан әскери техникалар жүреді. Егер өткен жылы шеруге 120 әскери техника, 40 ұшақ пен тікұшақ қатысқан болса, биыл 154 әскери техника, 66 ұшақ пен тікұшақтар өнер көрсететін болады. Бірінші рет шеруге 80 әйел әскери қызметші қатысады. Олар: мергендер, дәрігерлер мен медбикелер, психологтар және іс жүргізушілер. Әскери техникалардың қатарында 122 миллиметрлік Д-30 және 152 миллиметрлік «Мста-Б» зеңбіректері, «Тюльпан», «Смерч», «Рапира» артиллериялық жүйелері бар. Сондай-ақ «Град» және «Ураган» реактивті жүйелер машиналарын, «Точка-У» ракета кешендерін кездестіруге болады. Әскери техникалардың үлгілері қатарында шеруге танктер – Т-72Б, БМП-2, «Хаммер» және «Ланд Ровер» броньдалған әскери машиналары қатысады. «Біз шеруде жаңа техникаларды, артиллериялық жаңа жүйелерді, жинақы әскерімізді көрсетеміз, – дейді М.Майкеев. – Армия өзгеріп келеді. Онда сапалық көрсеткіштер артып келеді. Біз соларды алдағы шеруде паш етеміз. Жеке құрам Қарулы Күштеріміздің барлық гарнизондарынан келеді. Олар – үздік солдаттар мен үздік офицерлер». Сөз жоқ, Конституция мерекесі күніне орай өткелі отырған бұл шеру әскерилерге айрықша серпін беретіндігі анық. Ш. Нұрсұлтанқызы
2368 рет
көрсетілді0
пікір