• Қоғам
• 28 Шілде, 2011

Дін мәселесінде сергектік керек

Ақордада Елбасы Нұрсұлтан Назарбаевтың төрағалығымен Қауіпсіздік Кеңесінің кезекті отырысы болып өтті. Бұл басқосуда дін саласындағы тұрақтылықты нығайту мәселесі талқыланды. Жиында Елбасы тәуелсіздік жылдарында ел бірлігінің, ұлтаралық және дінаралық келісімнің, саяси тұрақтылықтың арқасында экономикамыз қарыштап дамып, халқымыздың тұрмыс-тіршілігі түзеліп, азаматтардың өмір сүру деңгейі артқанын айтты. Нұрсұлтан Назарбаев қазіргі кезде еліміздің экономикасы бірінші жартыжылдықтың өзінде өсім 7,1 пайызға өскенін атап өтті. Сондай-ақ Елбасы еліміздің дін ұстану еркіндігін жариялаған зайырлы мемлекет болып табылатынын, бірақ бұл жайт билік органдарының дін саласындағы қарым-қатынастарды реттеуден шеттетілу мүмкіндігін білдірмейтіндігін атап өтті. Елбасы мемлекетімізде діни экстремистік идеология элементтерін таратуға негізделген шаралардың алдын алу керектігіне айрықша мән берді. Мәселен, Ата Заңымызды күштеп өзгерту-ге, азаматтардың өмірі мен денсаулығына қатер төндіруге бағытталған ашық акциялар елімізде жүзеге аспауы тиіс. Осыған байланысты Мемлекет басшысы құқық қорғау органдары мен өзге мемлекеттік органдарға діни экстремистік бағыттағы жайттарды ашу және тез арада әрекет ету жөнінде тапсырма берді. Астана, Алматы қалаларының және облыстардың әкімдері тәрбиелік және профилактикалық жұмыстарды күшейтіп, діни бірлестіктердің қолданыстағы заңнама нормаларын қатаң сақтауын қадағалаулары қажет. Қазіргі кезде елімізде конфессиялардың саны 50-ден асып, діни қауымдастықтардың жалпы саны 4000-ға дейін өскен. Олардың арасындағы алауыздыққа жол бермей, дінаралық, ұлтаралық татулықты сақтау үшін ҚР Дін істері агенттігінің алдында маңызды міндеттер тұр. Мәселен, мемлекеттік құрылым жалпақ әлемді алаңдатқан діни экстремизм мен терроризмнің алдын алу бағытында жұмыс істейтін болады. Елбасы Қауіпсіздік кеңесінің отырысында осы мәселені баса айтты. Ал ҚР Дін істері агенттігінің төрағасы Қайрат Лама Шарифтың айтуынша, жаңадан құрылған ҚР Дін істері агенттігі азаматтардың діни сенім бостандығына деген құқығын қамтамасыз ету саласындағы дін саясатын түсіндіру жұмыстарын жүргізумен, діни бірлестіктер жөніндегі заңнаманы жетілдіру жөнінде ұсыныстар әзірлеумен айналысатын болады. Сондай-ақ діни экстремизмнің алдын алу шараларынан бөлек, қоғамымыздағы тұрақтылықты нығайтуға ықпал ететін, рухани ағартушылыққа бағытталған іс-шараларды өткізуді жоспарлауда. С.Қадырбек