- Ақпарат
- 19 Сәуір, 2012
Малайзияға сапар
Өткен сейсенбіде Елбасы Нұрсұлтан Назарбаев ресми сапармен Малайзия мемлекетіне барды. Оңтүстік-шығыс Азиядағы экономикасы қарқынды дамыған Малай елінде Елбасы алдымен осы елдің Сыртқы істер министрі Анифах Аманмен және Еңбек министрі Дато Шазимин Бин Абу Мансурмен кездесті. Тараптардың әңгімелесуі барысында сапар жайы жан-жақты талқыланды. Одан кейін Нұрсұлтан Назарбаев бейресми жағдайда Малайзияның бұрынғы Премьер-министрі Мохатхир Мохаммадпен жүздесті. Екі елдің көшбасшылары жылы шырайлы рәуіште еркін әңгіме құрып, кең ауқымды мәселелерді талқылады. Елбасы атап өткендей, Малайзия Қазақстанның Оңтүстік-Шығыс Азиядағы негізгі серіктестерінің бірі болып табылады. – Біз Малайзияның заманауи ғылымды қажет ететін экономиканы және инновацияны дамыту үшін тиімді инфрақұрылымды құрудағы табыстарын зейін салып қадағаладық. Қазақстан Сіздің елдеріңізбен жан-жақты, өзара тиімді ынтымақтастықты одан әрі дамытуға ниетті, – деді Елбасы. Өз кезегінде М.Мохаммад мемлекетіміздің ұлтаралық және конфессияаралық келісімді қамтамасыз етудегі бірегей тәжірибесін атап өтті. Еліміздің тәуелсіздік жылдарындағы қол жеткізген орасан жетістіктерін жоғары бағалады. «Қазақстан – саяси және экономикалық реформаларды іске асыруда барлық жас ұлттарға ойластырылған және көреген қадамдарымен үлгі көрсеткен Орталық Азиядағы жетекші мемлекет. Қысқа мерзімде Сіздің ел тамаша нәтижелерге қол жеткізді. Сіздің шикізаттық экономикадан жоғары технологияға өту бағытындағы салиқалы саясатыңыз Қазақстанды XXI ғасырдағы ең табысты мемлекеттердің қатарына қосатынына сенемін, – деді Мохатхир Мохаммад. Кеше Нұрсұлтан Назарбаев Малайзия мемлекетінің жоғары басшылығымен екі жақты кездесулер өткізді. Алдағы уақытта қос ел арасындағы әріптестік қарым-қатынас нығая түсетін болады. Сұлтан Қадырбек
2545 рет
көрсетілді0
пікір