- Мәдениет
- 26 Сәуір, 2012
«Тұран» тектілік танытты
Қазақстан Республикасы Тұңғыш Президенті Қорының грант иегері – «Тұран» этно-фольклорлық ансамблі қазіргі таңдағы ұлттық музыка бағытында еңбек етіп келе жатқан бірегей топтардың бірі. Топ мүшелері – Мақсат Медеубек, Қорлан Кәртенбаева, Абзал Арықбаев, Бауыржан Бекмұхамедов, Серік Нұрмолдаев республикалық және халықаралық конкурстардың жүлдегерлері. Әрқайсысы төрт және одан да көп аспаптың құлағында ойнайтын музыка шеберлері. Ансамблдің құрылғанына төрт жылдай уақыт болса да, олар бүгінде АҚШ-тың әйгілі Карнеги Холында, Франция, Германия, Италия, Испания, Жапония, Кореяның үлкен сахналарында өнер көрсетіп, қазақ халқының ұлттық музыкасын бүкіл әлемге насихаттап, дәріптеу жолында келе жатыр. Бір атап өтерлігі, «тұрандықтар» түркі халықтарының отызға жуық аспаптарын шебер меңгеріп, нақышына келтіріп орындайды. Өнерпаздардың киімдері көне түркілік нақышта тігілгені байқалады. Топтың сахналық ізденістері, музыкалық шығармалардың қаймағын бұзбай орындауы да өнер ұжымының аса жоғары талғампаздығын аңғартады. Көрермендерді жалықтырмайтын туындылары әсерлі қойылымдарымен өрнектеле түскен. Ұжым мүшелерінің айтуынша, олардың басты мақсаты – көнеден келе жатқан ұлттық әуендерді реңін бұзбай, саф алтындай таза күйінде жеткізу. Бір қуанарлығы, «Тұран» этно-фольклорлық ансамблі тек қана өнердегі биігін бағындырып қана қоймай, соңғы кездері қайырымдылық шараларына да атсалысып жүр. Бұған дәлел – Қаскелең қаласындағы Мәдениет үйінде өткізген қайырымдылық концерті. Ансамбльдің менеджері Хангелді Сағатбекұлы: «Біз бұл қайырымдылық концертіміз арқылы материалдық көмекке мұқтаж, ауыр науқасқа шалдыққан Қаскелең қаласының тұрғыны Исламбек атты балаға қуаныш сыйлағымыз келді. Ол жасы он бесте болса да, бүгінде екінші сыныптың оқушысы. Басында қатерлі екі ісігі бар. Көзі дұрыс көрмейді, құлағы естімейді. «Осындай баланың ауыр өмірін өз көмегіміз арқылы біраз болса да жеңілдетсек» деген ойменен жасап отырмыз. Концерттің өтуіне қолдау көрсеткен Қарасай ауданының әкімдігіне рахметімізді айтамыз. Бұл кеште кез келген жан Исламбекке өз көмегін жасай алатын мүмкіндігі бар», – деді. «Көп түкірсе, көл» демекші, концерт барысында қомақты қаржы жиналып, оны топ мүшелері көпшіліктің көзінше Исламбектің ата-анасына өз қолдарымен табыс етті. Бұл көріністі тамашалаған халықтың көңілі толқып кеткені де сөзсіз. Қайырымдылық шарасына жиналған көпшілік қауым, ақсақалдар алғыстарын білдіріп, сөз сөйледі. Исламбектің ата-анасы өз қуаныштарын жасыра алмай, «Тұран» этно-фольклорлық тобына шексіз ризашылығын білдірді. «Баламыздың бір арманы орындалатын болды. Біз бұл дүниеде жалғыз емес екенбіз. Бізді қолдайтын халық, азаматтар бар екен» деп, көздеріне жас алды. Дәуіржан Төлебаев
3106 рет
көрсетілді0
пікір