- Руханият
- 26 Сәуір, 2012
«Түнгі оттардағы» күн шуағы
Жас ұрпақты, әсіресе, ел тәуелсіздікке қол жеткізген жаңа кезеңдегі ақпарат топанына тоғытылып жаңғырған сана иесі – бүгінгі жас буынды, келешектің иесін тәрбиелеу жайындағы мәселе – қай заманда да күн тәртібінен түсіп көрмегені шындық. Бұл жайында Бәрі айтады, Ақыл айтады, Кеңес айтады. Мысал келтіріп айтады. Біліп айтады. Білмесе де, өз жөнін жөн көріп айтады. Қинала айтады. «Ел боламын десең – бесігіңді түзе» дейді. Неден бастап түзеу керектігін ешкім айтпайды. Жазушы Заря Жұманованың шығармасында қоғамдағы көнеру мен жаңарудың өліара кезеңіндегі жаңа мінез-құлық иелері арқылы жылт еткен үміт ұшқынынан жақсылықтың жалыны лаулайды.
Түнгі от адамға не береді? Қараңғыда жағылған шырақ па, әлде елсізде қорқаудың қамауында қалған жолаушының қурай тұтататын шақпағы ма? Әйтеуір, тіршіліктің, жақсы үміттің, жоқ іздеудің, барды түгендеудің қам-қарекетіне қажетті нәрсе екендігіне күмәнім жоқ.
«Түнекке жұтылған түнгі оттардағы» жолаушы қос келіншек түн тылсымын тіле заулап келе жатқан пойызбен қапталдаса жылт-жылт еткен айдаладағы жалғыз-жарым ауыл оттарының қараңғылық қойнауына сіңіп, ғайыпқа айналып жатқан көрінісіне ұзақ тесіле қарап отырып, суыртпақтап сыр шертіседі.
«Түнгі оттар қандай аянышты?! Бұрын мен де айдаладағы меңіреу ауылда тұрғам...» дейді қара торы келіншек. Тағдыр өзі жарылқап, тағдыр өзі жылатқан, сол тағдыр ойда жоқта жар құшу бақытына кенелтіп, сол бақытынан ойда жоқта көз жаздырған кеншілер қалашығында тұратын жас жесірдің дүниеге ұл әкелген сәттегі жердің бір солқ еткені – шахтадағы жарылыста жер астында қалған жан жарының өлімі – бір түнек пен бір сәуле қабат келетін өмір заңдылығының мысалы.
Жазушы З.Жұманова шығармасында қоғамдағы көнеру мен жаңарудың өліара кезеңіндегі жаңа мінез-құлық иесі арқылы жылт еткен үміт ұшқынынан алақандай Сүйкімді ауылында жақсылықтың жалыны лаулайды. Қандай жақсылық еді ол?
Сол мектептен, сол ұстаздардан күні кеше ғана дәріс алған жас түлек Күншуақ оқуға сырттай енді ғана қабылданып, ауылына асығады. Сағыныш отына өртене жаздап, алып ұшады. Ертегі тыңдап маңайында шырқ үйірілген іні-сіңлілерін, күзгі шаруа қамымен қарбалас тірліктен шаршап-шалдығып жүрген ата-анасын, ауылдастарын сағынады.
Ең бастысы, ел болашағы – жеткіншек тәрбиесіне негізделген көркем шығармалар ел ертеңінің иесін – жаңа ұрпақты тәрбиелеудің көнерген, кешегі әкімшіл-әміршіл жүйенің тұсындағы олқылығы көзге ұрып тұрған таптауырын, заманауи көшке ілесе алмаған, ескірген тәсілін ығыстырып, көкжиектен жаңа күннің шапағын шаша келген жаңару үрдісін балғын ұстаз Күншуақтың іс-әрекеті арқылы бейнелеген суреткер Заря Жұманова шығармасынан жаңа леп байқалады. Өзге қарқын, соны серпін әкелген шығарма деп айтуға болады. Мұнда көзге ұрып тұрған жаттанды идеологияның салқыны, жасқаншақтап, жалтақтап, жоғарыдан бұйрық күткен бұйығылық жоқ. Жанары жәудіреген жас ұстаз – Күншуақтың өмірден тәжірибе жиып үлгермеген, енді ғана ержетіп келе жатқан, бірақ жасөспірім көкіректерінде өз бойларындағы жігер мен өзіне өзі сүйсіну сезімі басым, үлкендер тарапынан өзіне өзінің сенімділігін нығайтатын қолдау-қолпаштау күткен балауса жеткіншектердің тамырын тап басуы нанымды суреттеледі.
«Түнгі оттарға» жинақталған әңгімелер мен хикаяттарды оқығанда бүгінгі күні біртіндеп-біртіндеп өзге үрдіс, бөтен дағды қалыптаса бастаған қоғамның бас ауруы мен жанайқайын сезініп, бейжай қала алмайсыз. «Көңіл терезесіндегі» Ризаға ұқсап, бір сәтке болса да қиял әлеміне талпынасыз, төңіректен селт етуге әзір тұрған саналарды іздеп, қармана бастайсыз. Ойша. Мұның өзі санаға қозғау түсірер жақсы үміт. «Ұшқыр кілем», «айшылық алыс жерлерден жедел хабар алғызған» бүгінгі байланыс құралдары – кешегі күннің аңсау-арманы еді ғой. Олай болса, жазушы көксеп, кейіпкер аңсап отырған жан алауы да жағылар деп үміттенуге әбден болар... Капитализм – сөз жоқ, тиын-тебеннің, капиталдың үстемдігіне негізделген қоғам дамуының бір сатысы. Ал, өркениеттің дамуы тек техника мен технологияның жаңаруы ғана емес, саналардағы жаңғырумен де қатар жүреді. Заман ағымына ілесу жайбарақат тірліктен гөрі еңбектегі, күнкөрістегі, адамзаттың іс-әрекетіндегі ұтымдылыққа, қолма-қол нәтижеге негізделеді. Заря шығармаларындағы кейіпкерлер – кешегі кеңестік заманның тәртібіне көндіккен, жоғары жақтан бұйрық, нұсқау күтіп үйренген шеңбер аясынан шығып, жаңа леп, жеңіл қарқынға икемделуге бейім, жан-дүниесі шуаққа толы жандар.
«Түнгі оттардағы» тегеурінді тақырып – әйел затының мықтылығы, әйел табиғатындағы күрескерлік. Ана бақыты жолындағы қажыр-қайрат. Кешірімділік. Жалпы, «әйел» деген сөзді «ана» деген ұғымнан бөліп айтуға болмайтындай. Өйткені, Заряның кейіпкерлері «Қара бұлттан шыққан күндегі» – Зүбайда, «Шаңырақтың киесіндегі» – Несібелі, «Жалғыз шыбынды пәтердегі қырық шырақты әйел» – Толқын, «Салтанат немесе құмырадан шыққан құрбақадағы» – Салтанат пен Гүлзия, т.б. шеттерінен баласын да, енесін де, күйеуін де, тіпті, «бомжды» да, күллі тіршілік иесін аялауға, нәп-нәзік алақандарының жылуын аямай мейірім төгуге дайын тұрған жандар.
Жалпы, «Түнгі оттарды» оқи отырып, оқырман жазушылық деген киелі өнерді, қасиетті өнерді Жаратушы Иенің Заря деген әйелге де қондырғанына қуанады. Заря бірде Күншуақ, бірде Арай, бірде Толқын болып күңгірт тартқан тағдырларға, жабырқаулы көңілдерге шуақ таратудан жалықпайды.
Шығарма – ұрпақ тәрбиесі, адамдар арасындағы бір-біріне деген бейқамдық пен қамқорлық, ер-азаматтардың тарапынан байқалып қалатын жігерсіздік пен осалдық, әлеуметтік проблемалар, қоғамның қалыптасу барысындағы әйел затының жанкештілігі мен нәзіктігін шынайы суреттеген көркем дүние. Оқырманын ойға жетелейтін, зерделеуге талпындыратын әңгімелер қазақи болмысымен де тартымды.
Қалампыр КЕНЖЕҒАЛИҚЫЗЫ,
журналист
Алматы
541 рет
көрсетілді0
пікір