• Ақпарат
• 24 Мамыр, 2012

Жастар баспаналы болады

Елбасы тапсырмасын үлкен жауапкершілікпен орындап, көптің құрметіне бөленіп жүрген Атырау облысының әкімі Бергей Сәулебайұлы Рысқалиев өткен дүйсенбіде облыс жұртшылығын тағы бір елең еткізді. Айналасындағы атқамінерлерді қатыстыра отырып, жаны жабырқау жастарды жинап, Атырауда жетімдер үйінен шыққан жастар баспанасыз болмайтынын мәлімдеді.– Мемлекет саясатын берік ұстанып, қазақы болмыстың қалпын бұзбай, сақтаған қазыналы өңірдің, облыс халқының ерен еңбегімен, биік жетістіктерімен республикадағы оң үрдістерге елеулі үлес қосып келе жатқанын мәртебе тұтамыз. Қол жеткен жетістік құр сан жүзінде қалмай, халықтың өмірінен нақты көрініс тауып, тұрмыс деңгейінің өскенін дәлелдейді, – деді облыс басшысы. Сөз жоқ, Атырауда Елбасының Жолдауынан туындайтын міндеттер мінсіз орындалып келе жатыр деуге толық негіз бар. Әсіресе, «Тұрғын үй» бағдарламасының қарқыны көңіл қуантарлықтай. Соңғы бес-алты жылда 20 жылдан астам кезекте тұрған мұғалімдер, дәрігерлер, ардагерлер, әлеуметтік тұрмысы төмен отбасылар, жас мамандар үйлі болып, шаттыққа бөленуде. Енді, міне, жетімдерді тұрғын үймен қамту мәселесі де оңынан іске асырылып отыр. Алқалы жиында облыс әкімі жетім балалар үйінен тәрбиеленіп, аудандарға еңбекке араласуға баратын 40 жасқа пәтер берілетінін айтты. Тағы 37-сі болашақта жаңа пәтерлердің кілтін алады. Сондай-ақ, Бергей Сәулебайұлы аудан әкімдеріне жастарға берілетін пәтерлерді жиһаздармен жабдықтау, балаларын балабақшаға орналастыру сияқты әлеуметтік қолдаулардың еш кедергісіз көрсетілуін тапсырды. Осы жерде тоқтала кететін бір жайт, бұған дейін, яғни соңғы бес жылда Атырау қаласының Нұрсая, Алмагүл, СМП-137 ықшамаудандарында сексенге жуық ата-ана қамқорлығынсыз өскен балаларға әсем де жарық пәтерлер берілген бо­латын. Иә, қазақ халқы өз баласын ешқашан өзекке теппеген. Облыс әкімдігінің «Жетім көрсең жебей жүр» деген ата-бабамыздың аманатын абыроймен орындап жүргені нұр үстіне нұр болып отыр. Өтеген Нәукиев АТЫРАУ