• Ақпарат
• 31 Мамыр, 2012

"АЛТЫН ЖҰЛДЫЗ" ТАПСЫРЫЛДЫ

Қазақстан баспасөз клубында журналистерге сыйлықтар тапсырылды, сондай-ақ жаңа кітаптың тұсаукесері өтті. Бұл басқосудың тағы бір ерекшелігі – Қазақстан Журналис­тика академиясына жаңадан академиктердің қабылдануы еді. Олардың ішінде белгілі қаламгер, ұзақ жылдар бойы баспасөз саласында жемісті қызмет етіп келе жатқан, республикалық «Ана тілі» газетінің бас редакторы Самат Ибраим да бар. Мұндай құрметке ие болуы газет ұжымы үшін де ­– зор абырой. Журналистика академиясының академиктері қатарына қабылданғандар ішінде «Новая газета – Казахстан» ба­сы­лымының бас редакторы Амантай Дандығұлов және тележурналист, «Портрет недели» бағдарламасын жүргізуші Сергей Паномарев бар. Аталған академия президенті Сағымбай Қозыбаев жаңа академиктерге дипломдар мен дәстүрлі, мәртебелі журналистік «Алтын жұлдыз» сыйлығын тапсырды. «Алтын жұлдыз» сыйлығына «Егемен Қазақстан» газетінің тілшісі Айнаш Есали, «Алматыкітап» баспасының басшысы Эленора Баталова, павлодарлық фотожурналист Владимир Бугаев ие болды. Осы шара барысында Журналистика академиясының президенті, профессор Сағымбай Қозыбаевтың «Гордое имя – журналист» атты кітабының тұсаукесері өтті. Автор бұл кітабында журналист қауымының қоғамда алар орнына баса көңіл бөледі. Біз мәртебелі атақ пен сыйлыққа ие болған әріптестерімізді шын жүректен құттықтап, шығармашылық табыстар тілейміз. Нұркен Жандәулетұлы