- Ақпарат
- 31 Мамыр, 2012
БӨБЕКТІҢ КҮЛКІСІ
күмістей таза...
Күн жебеп гүлдер жайнады,
Гүлге кеп бұлбұл сайрады.
Бөбегім күліп, жайдары,
Бөленіп гүлге ойнады.
Бұлақтай мөлдір сылдыры,
Құрақтай көркем сыбдыры.
Күлкісі әсем бөбектің –
Күмістей таза сыңғырлы.
Балқытқан бойын ананың,
Шалқытқан көңілін бабаның.
Күніндей жарқын ғаламның,
Күлкісі – бақыт баланың.
Күлкі мен шаттық күнің көп,
Күле бер, бөпем, күнім боп.
Балалық
Ау, балалық! Балалық!
Ауламызға баралық.
Шаттанып би билейік,
Шаттық әнге салалық!
Қызық-думан, балалық,
Қызығыңды табалық.
Ойнап-күліп, шынығып,
Оқып,білім алалық.
Бақытты жас балалық,
Бақытыңнан жаралып.
Елге нұр боп, таралып,
Еңбекке де баралық.
Ұлан мен уақыт
«Еріншексің» дегізбей,
Ерте тұрам сегізде.
Ширығамын мен енді:
Шынықтырам денемді.
Тартып кран суынан,
Тазаланып, жуынам.
Орнымен жеп тамақты,
Орындаймын сабақты.
Көп отырмай, арада
Көмек берем анама.
Мен емеспін салақ, паң
Мектептегі сабақтан.
Кешікпеймін, келемін,
Кедергіні жеңемін.
Әр сабақтың үстінде,
Әдеп сақтап ісімде.
Ұстаз сөзін тыңдаймын,
Ұғымымды шыңдаймын.
Сабақтан соң ойнаймын,
Сан қызыққа тоймаймын.
Таңдап, кітап оқимын,
Талдап, ойға тоқимын.
Үйірмеге аптығам,
Үйімде де жаттығам.
Тұрам айтқан сөзімде,
Тура онның кезінде.
Ұйпаланбай қалжырап,
Ұйықтаймын балбырап....
Пайдаланған уақытты
Пайымды Ұлан – бақытты.
2399 рет
көрсетілді0
пікір