- Ақпарат
- 05 Шілде, 2012
Мереке құшағында
Кино фестивалінің қызықтары Елорданың 14 жасқа толған туған күнін мерекелеу қарсаңында 1-3 шілде күндері Астанада белгілі кинорежиссер Тимур Бекмамбетовтің ІІІ халықаралық Астана экшн-фильмдері фестивалі өтті. Биыл үшінші рет өткізілген фестивальге әлемдік кино индустриясында өзіндік қолтаңбасы бар белгілі француз актері Венсан Кассель, америкалық режиссер, аты аңызға айналған «Тристан мен Изольда» және «Робин Гуд: Ұрылар ханзадасы» фильмдерін түсірген Кевин Рейнольдс, «Президент Линкольн: Вампирлар аңшысы» фильмінің продюсері Джим Лемли мен танымал продюсерлер Джон Дж. Келли, Дэни Вульф пен Канг Дже Гю, ресейлік жұлдыздар Елизавета Боярская, Алексей Воробьев, Мария Голубкина, Галина Коньшина, Артем Ткаченко, Юлия Ковальчук, Аркадий Укупниктер келді. Шетелдік қонақтардан өзге өзіміздің әйгілі кино жұлдыздарымыз Асанәлі Әшімов, Рашид Нұғманов, Венера Нигматуллина бастаған актерлер мен Ақан Сатаев қостаған режиссерлеріміз де қызылтүкті кілемнің үстімен жүріп өтті. Фестиваль Тимур Бекмамбетовтің режиссерлік жұмысы – «Президент Линкольн: Вампирлер аңшысы» фильмімен ашылды. Жалпы экшн-фильмдер фестивалі шеңберінде әлемнің белгілі кино жұлдыздарымен баспасөз-конференциялары, эксклюзивті сұхбат, қайырымдылық шаралары, Қазақстан және Ресей жобаларының тұсаукесері, «Қысқа метражды кино түні», «АртФест» артинсталляция, бейнеинсталляция тұсаукесері, суперкейіпкерлер костюмдерінің байқауы өткізілді. «Азия жаңғырығы» Елорданың 14 жасқа толған туған күнін мерекелеу шараларының басы жексенбі, яғни 1 шілде күні астаналық циркте «Азия жаңғырығы» халықаралық цирк өнерінің фестивалі шымылдығын түрді. Дәстүрге айналған фестиваль қалалықтардың сүйікті шарасына айналған. Жыл сайын «Цирк дарындары» шоуы қалалықтардың сүйіктісіне айналып келеді. Биыл «Азия жаңғырығы» халықаралық цирк өнері фестивалінің 5 жылдық мерейтойы. Сондықтан 1-8 шілде аралығында әлем сахнасының танымал артистері мен жұлдыздары мерейтойлық фестиваль қатысушыларына айналады. Көпұлтты цирктің көркемдігі мен ерекше көрінісін биыл Ресей, Қырғызстан, Өзбекстан, Қытай, Моңғолия мен Қазақстан артистері көрсетіп жатыр. Фестиваль бағдарламасына Моңғолияның епті де өнерлі қыздары, Қытайдың бірегей әуе гимнасшылары, Ресей, Қырғызстан, Өзбекстан мен Қазақстанның қайталанбас әрі жарқын цирк көріністері және үйретілген аю, пони, лама, маймыл, жолбарыс, көңілді сайқымазақтар циркке ынтызар қауымның көзайымына айналуда. Бұл мерейтойлық фестиваль барша цирк қоғамдастығы мен цирк жанкүйерлерінің назарын өзіне аудартып, Астананы цирк өнерінің астанасы ретінде таныстыруда. Бейбітгүл ИСАЕВА
2497 рет
көрсетілді0
пікір