- Ақпарат
- 05 Шілде, 2012
Арманға қол создырған ару қала
Күні ертең еліміздің асыға күтетін мейрамы – Астана күні. Мемлекетеміздің бас қаласы - Астана жылдан-жылға жақсара түсіп, халықаралық сипаттағы маңызды кездесулер өтетін орталыққа айналды. Әлем жұртшылығы Астана арқылы Қазақстанды танып білді. Астана арқылы еліміздің бейбітшілікке, ынтымаққа, экономикалық өсімге, өрлеп, сатылап дамуға қадам басқанына куә болды.
Осылайша, бүкіл халықтық мақтанышқа айналған Елордамыз бүгінде саяси-экономикалық шешімдер қабылданатын қала болуымен қатар, әсем салтанатымен келешекке бой түзеп, жайнап, жасарып, өсіп келеді. Бұған дәлел жыл сайын, тіпті ай сайын жаңадан іске қосылып жатқан әлеуметтік нысандар, тұрғын үйлер, мәдени ошақтар. Биыл да Астананың туған күні қарсаңында көз тартарлық, заманауи үлгідегі бірнеше ғимараттар бой көтеріп, қаланың сәулетіне жаңа реңк пен бояу алып келді. Солардың бірі – «Қобыз сарайы» концерт залы. «Қобыз сарайы» өнерсүйер қауымның сүйікті мекеніне айналмақ. Бірегей мәдени нысан қазақтың ұлттық-фольклорлық музыкасын насихаттау және шетелдік туристерді көптеп тарту мақсатында салынған. Концерт залының бір ерекшелігі – мұнда акустикалық талаптардың барлығы сақталынған. Сахнадан әуелеген әуендер тыңдармандарына дыбыс күшейткіш құрылғысыз-ақ естіледі. Ғимаратта концерт залынан бөлек 125 орындық 79 қонақүй нөмірі, 170 орынға арналған мейрамхана, 80 орындық дәмхана, фитнес орталығы орналасқан. Бір сөзбен айтқанда, «Қобыз сарайы» орталығы бүгінгі заманның барлық талаптарына толығымен жауап беретіндей. Астанада салынып жатқан Классикалық опера және балет театрын бой көтеріп келе жатқан ерекше мәдени нысандар қатарына жатқызуға болады. Құрылыстың біту мерзімі осы жылдың желтоқсан айына белгіленіп отыр. Ғимарат сәулет өнерінің ғажайып үлгілерімен тұрғызылуда. Бұл театрдың дүниеге келуі Астана жұртшылығы үшін елеулі оқиғаға айналмақ. Астана тойына орайлас келіп ашылған әлеуметтік маңызды нысанның бірі – 350 төсек-орынға арналған №2 қалалық балалар ауруханасы. Бұл аурухана балалар денсаулығын қорғаудың қазіргі заманғы медициналық аппаратарымен, диагностикалық құрылғылармен, компьютерлік технологиялармен жабдықталған. Мұнда бет-жақ хирургиясы, оңалту сынды жаңа бөлімшелермен қатар нейрохирургия, неврология бөлімшелері жұмыс жасайтын болады. Ауруханада қызмет істейтін дәрігерлер шет мемлекеттерде арнайы дайындықтан өтіп, білімдерін жетілдіріп келген. Елордамызда өндіріс орындары да дамып келеді. Солардың бірі – Eurocopter зауыты. Ол тікұшақтарды құрастыру және оларға қызмет көрсету үшін салынуда. Бұл зауыт Қазақстан мен Франция елдерінің арасындағы келісім негізінде жүзеге асты. Eurocopter зауытына жергілікті мамандар да тартылып, олар тікұшақты құрастырудың, басқарудың және оған қызмет көрсетудің қыр-сырын үйренбек. Елбасының идеясымен жүзеге асқан Астана маңындағы орман белдеулері қанатын кеңге жайып, қаланы жасыл желекке орап, көркейте түсуде. Бүгінде Астана маңында 60 мың гектар ағаш отырғызылса, қаланың өзінде 16 мың гектар ағаш бой түзеген. Бұл орман ағаштарын келешекте Бурабайға дейін жеткізу жоспарланып отыр. Осылайша, Астана қаласының дамуы әлемдік деңгейдегі қалалардың даму қарқынынан қалыс қалып жатпағанына көз жеткізуге болады. Елордамыздың Қазақстанның өзге де қалаларына үлгі боларлықтай гүлденіп, өркендеуі бүкіл халқымыздың бойына рух беріп, жігеріне жігер қосып, жарқын үміт пен биік арманға қол создыруда. Астананың тойы ұлттық бірігудің, достықтың, табысты болашақтың тойы екеніне ешқандай күмәніміз жоқ. Дәуіржан Төлебаев
2614 рет
көрсетілді0
пікір