- Әдебиет
- 14 Маусым, 2012
Фәнилік драма
Арғынбай БЕКБОСЫН
Адамның көрсем де көп піратқанын,
Жоқ, тәубе, әлі ешкімді жылатқаным.
Жыласа ол қайда қашып құтыларсың,
Құлақты кессең кетпес құлақтағы үн!
***
Біреуді қанша ұлыға баласаң да,
Алдында аңқау баспен аласарма.
Құдайдың ол да құлы, сен де құлы,
Құлшылық құлдан құлға жарасар ма?!
***
– Күйіп тұрып бір жолы былай деп ем:
«Естімесе бұл зарды Құдай – керең!..»
Кеш түсіндім, кеш, Алла? Жарылқадың!..
Енді өртеніп кетсем де шыдай берем!
***
– Сиқыршы жалған! Мен саған құлшынып
не етем?
Сайқалдай еліктірсең де түршігіп кетем…
Әлде көз жұмып салсам ба екен сайранды,
Қойныңнан сенің бәрібір бір шығып кетем?!
***
Бұл мәңгі есеп кез келген көнер пенде:
Өмірден алғаның мен төлем тең бе?..
Қарғыс атсын демесең қарызды бер,
Қазір қайтар! Ертең жоқ көлеңкең де!
***
– Болсаң да тұлға емес, бірі көптің,
Өмірдің балын жұттың, гүлін өптің.
Тек ертең не болады? Ит біле ме...
Ал мен өз тозағымды жүріп өттім…
***
– Кім осы махаббатты тықпалаған?!
Ол берген азаптан не ұқпақ адам?
– Ұқпасын! Сезсін!.. Азап мың есе артсын!
Сүюсіз қалай жетпек құтқа Ғалам?!
***
Іңір туса тіршілік сап басыла,
Өткен күннің парағын жаппа асыға.
Көкке көз сал… көктегі қызыл арай,
Кім біледі… О дүние қақпасы ма?..
***
Білер ме ек жиылғанда кейде есіміз:
Жан жайлы мидағы не дейді есіл із?
«Адам» деп өзімізді күпінгенмен,
Мүмкін, тек Жанның сыртқы бейнесіміз?
***
Тоқтамай Ғарыш толы құйындарға,
Тәңірдің Күнінен нұр құйылғанда,
Өзіңді патша тұт та нұрға малын!..
Пендеге басқа теңдік бұйырған ба.
***
Әділеттің анық боп қашығы шын,
Қиянатқа қан қайнап, ашып ішің
тұру-тамұқ! Әлде… бұл – Алла амалы?
Адамдығын Адамның ашу үшін…
***
– Айтсам, қалқам, тым тосын тілегімді,
Үркітер ме деп қорқам жүрегіңді…
Айтшы: үрку айналса аянышқа,
Періште боп жасар ма ең бір еміңді?..
***
Бықсық сөзге Шындық сөз қол жайды ма?..
Онда жатқыз жағдайды оңбайдыға!
Мың желдеткіш мұндайда орнатсаң да,
Ауа таза болмаған. Болмайды да.
***
Өміріңнің әр күнін, әр аптасын,
Мәнді етсең – жатпайды қарап қасың.
Несін алдың?! Қорғар кім?.. Әй, бірақ та,
Күніңді Алла ешкімге қаратпасын…
***
– Тартқанда тағдырыңның қыл қобызын,
Қайтер ең қиқу салса кіл долы ызың?
– О, онда ол қиқуға қиқу қосам,
Бақиға бастағанша бір жол ұзын!
***
– Азабы ақылыңа сыймаса да,
Пірәдар, әр күніңді сыйға сана.
Бұл жаққа кейін қайтып келе алмаспыз,
Тозған тән асқақ жанды қимаса да.
***
– Қасым жоқ! Ойлап қайтем босқа мұңды ой…
Бәрі жай сенің әзіл-оспағың ғой!
– Өзіңді қаралаған қараулар ше?
– О, олар – менің байғұс достарым ғой!..
***
– Тыңда, достым, ес-дертің ауып тыңда:
есің барда сұлуды жауықтырма.
Бір жалт қарап жүрекке жүз оқ атса,
Пайдасы жоқ сан қабат сауыттың да!
***
– Қарамай телісе де кімді кімге,
Сүйіп қал шын асылды тірлігінде.
Қызғанба кейінгі оған ғашық болса,
Уақыттың «жүз жыл», «мың жыл» бірлігінде!
***
– Масайрап кемді күнгі салтанатқа,
Күншілдің көзін, байқа, қанталатпа.
Қызыл ит – қызғаныш та, амалың не,
Сыйса егер «Өмір» дейтін жалпақ атқа?
***
Құрғатса да көз жасын жел есілген,
Шығара алмас қу Жалған сені есімнен!
Ал кездесу үміті тек Бақида,
Күн кешермін әзірге… елесіңмен…
***
Жастықта бұлбұл ұшып бұлдыраған,
Армансыз әнге қостық гүлді ұнаған.
Ал бүгін қағып қалсаң мұң шығар ғып,
Құлағын домбыраның кім бұраған?
***
– Ей, ұлық! Зәрің шашпа кемнесіпке,
Онсыз да ол азапты кем кешіп пе?!
Бетіне қай бетпенен қарауды ойла,
Екеуің тербелгенде жербесікте…
***
Толқынынан тудым да Таласымның,
Олқы-толқы күн кештім. Аласұрдым.
Аласұрып асыл тас іздемедім,
Іздегенім: Жалғанда жаны асыл кім?..
***
– Ақыл тек еншісі ме ақылманның?
…Дегенмен, сен шындыққа жақын қалдың.
Ал, жүрек… әр кеудеде тұрғанымен,
Меншігі ол Батырлар мен Ақындардың!
***
– Бір туар дүниеге ажалды Адам,
Өз атын, затын немен ажарлаған?
– Әуелі сөзбен!.. Және сөз болғанда,
Сөзбенен бедері ешбір қажалмаған.
***
Түсімде әлгі, Тәңір-ау, не деді, не?..
Бар айтқаны – Бақидың дерегі ме?
«Ертеңің…» деп бірдеңе мыңқылдады…
Ертеңі жоқ Өмірдің керегі не?!
***
– Дерт болып асыл әрі күйікті арман,
Жан ем ғой өзі өзімен тұйықталған!
Неге сен кенет кез боп, өшің бар ма,
Жүректі жұлқып кеттің ұйып қалған?..
***
– Қазірде де аулақпын немкетті ойдан.
Қинамашы?! Қинама. «Сен» деп тойғам…
Мүмкін дұрыс емес те шығар мұным:
көп ауырған көңілді жерлеп қойғам…
***
Күтсем де ақ ниетпен әр ақ таңды,
Қу тағдыр талай итке талатқан-ды.
Мың тәубе, қайсар жаным жасыр емес,
Медеу ғып жалғыз ғана Жаратқанды!
***
– Қабағыңнан, жас пері, қар түсірме!
Сөзіме бақ мағынасын сәл түсін де:
Батқан Күнді, әнеки, көрмеймісің,
Ешкім тұрып қалмайды талтүсінде!..
***
– Ал мына тост… сендей «достан»
құтылғаным үшін,
Сенің өткен шағымызға жұтылғаның үшін,
Жаннан артық көрген жаннан
опа таппай менің,
Сұм Жалғаннан тағы да бір ұтылғаным үшін!..
***
– Ей, досым, ажалды ойлап алаңдама,
Алаңда алмасам деп жаман баға.
Адамның Алла үшін өлгені жоқ,
Санайды өлдіге оны адам ғана!
***
Әдемі ойдан бір Әлем құрсам деген,
Сөйтіп соны мекен ғып тұрсам деген,
қайран Арман!.. Қайтейін, қажыдың-ау,
Күнде алысып күн бермес мұршамменен!
***
Ұшты деп құдай берген бастан бағым,
Басылып асқақтаған аспанға арын,
Алыстап өз-өзіңнен бара жатсаң –
Басқаның емес пе Ажал баспалдағын?
***
– Жеріміз жоқ, о, Тағдыр, өкпелескен,
Айтшы, бірақ: өмірде өкпек ескен,
Бар көргенім бір ұзақ қыс секілді,
Ұлы көктем кете ме көктеместен?..
***
– Тарих қана анықтар дананы шын.
Келістің ғой?.. Берсе атақ аламысың?
– Ойыншық та керек қой ойын үшін,
Өмір-ойын… ұқпайтын баламысың…
***
Мақтама ешкімді де тым асырып,
Даттама бәрін оның күнәсі ғып.
Өйткені өзін толық білмейді ешкім.
Ал сенің білем деуің?.. Бұл – асылық!
***
– О, Мұқа, Мұқағали, ұлағаттым!
Сөзіңді «бауырым» деген мұраға аппын.
Жасаудың тар заманда кең әлемді
тәсілін, әттең, сонда сұрамаппын!..
***
– Ізетсіз деп мені сен тасырлама:
ақ жүрекпен тұта алам асылды аға.
Аяқ-табақ айлаға айналмайды!..
Пейіл берем. Сөйткенмен басында да.
***
– Қазір де арын қорғап өз басымның,
Тұрса да келмей бастан сөзді асырғым.
Мен кештім!.. Кешпеуге енді амалым не,
Дәмі өртеп кетті, жаным, көз жасыңның.
***
Арсыз алса Өмірден жұлып, кесіп,
Арлы алдында әрқашан – құлыпты есік.
– Олжасы оның сол болсын, қорға, Құдай,
Тым болмаса жүрегін шұрық тесік?!
***
– Жалға алғандай Жалғанның айтақырын,
Күндіз-түні қу дүние – айтатының.
Сәл демалшы… әлде, дос, шықты ма естен,
Жалаңаш кеп, жалаңаш қайтатының?
***
Жас балаша жақсыңа қуанбаса,
Қайғыңды естіп құп-қу боп қуармаса,
Дос дегенің дос па өзі? Әлде… әлде…
Әй, дегенмен мән берме бұған да аса…
***
Туыс болса-ау жол жүрсең – жолға алаңдар,
Дос болса ғой сырыңды сол ғана аңдар!..
Болмаса да жақынды жамандама,
Одан да өткен, өйткені оңбаған бар!
***
– Қадірлім, бір сыр айтам – алсаң аңдап:
тек Рух қана Ертеңді қарсы ала алмақ.
Күйретсе күйкіні Өмір, өршіл Жанның
алдынан шығар иттей арсалаңдап!
***
– Қарағым, қайғы кепті!.. Тым жасыма,
Қайрат қып, күт жақсылық күнді асыға…
Ал, жалпы, қайғы-уайым пақыр түгіл,
Жетеді патшаның да бір басына.
***
– Тарылды ғой жанымның кемері шын!
Жалынайын – кешіріп, келемісің?..
Баяғыдай бақытты ете гөрші,
Сен – бақытты етудің шеберісің!..
***
– Бүгінде әр нәрсеге тым күдікті ел,
Өмірді мәңгілік не бір күндік дер.
Жарты күн боп кетсе де, ей, Уақыт,
Айтайын айтарымды – мүмкіндік бер!
***
– Дүние бас иеді бұл дарынға!
Қарашы ойындағы нұрлы ағынға!..
– Саған да Алла разы – дәл танысаң,
Аңыз боп кетпей әлі ол тұрғанында.
***
– Ақсақалға тағдырдың тоңын көрген,
Кебіс тұрар орыннан орын берген,
Тойға «рахмет» айттағы қайт үйіңе!..
Адаспайсың. Жатыр ғой жолың келген…
***
Жалауы боп жалтылдап таңдағы арай,
Атойлайды Уақыт алға қарай.
Сол шіркінің бір мезет кері айналса-ау,
Бір жарқ ету үшін-ақ ардақ Абай!..
***
Немене өзі Өмірді кешу деген?..
Өткізу ме қызықпен не шуменен?
Әлде өлгенше түйінді түйдек-түйдек,
Жүруі ме пенденің шешуменен?
***
Білгендей Тарих өртеп, жоймасын да,
Мың жылдар жатыр оның қоймасында.
Безбендеп әрбіреуін көрер ме еді:
Тағылық әлде Адамдық ой басым ба?
***
Сезілгені болмаса көңілменен,
Ешуақытта ешкімге көрінбеген –
Ол не?.. Әлде мезеті жеткен кезде,
Қоштасу ма өзіңмен – Өлім деген?
***
Мейлі, Жер мен жарылсын оттан Аспан,
Келген Уақыт кетеді тоқтамастан.
Қайдан келді Ол? Кетеді және қайда?..
Әлде оның мекені жоқ па бастан?..
***
– Ол жігіт, ей, ағасы, ақтар үміт!
Ат-шапан үшін жүрме сақтап ілік.
Ал, жалпы, атта тұрған не бар, тәйір,
Бақиға аттанбайсың атқа мініп.
***
Тоқталса ақырындап бір күні дем,
Сағынып мені еске алар кімді білем?..
Тып-тыныш қиса ұйқыны – сол да жетер,
Тірілер жүре берсін тірлігімен…
***
– Ау, бұл қалай, көңліңнің жасығаны?
– Бір көкірек мені ылғи басынады…
– Тастан Тәңір көкірек жасамаған,
Аз шыдасаң өзі ит боп басылады!
***
Адамдық – әлмисақтан тұрақты ұғым,
Тұратын жанның, тәннің құрап түрін.
Неге онда ит қыласың бір байғұсты,
Сен оның білесің ғой бір-ақ қырын?!
***
Бұл не өзі кісіге кіріптарлық?
Тағдыр тіккен шоқай ма бүріп, тар ғып?..
Шоқай болса, шоқаймен жүріп келем,
өзге түгіл өзімді… күліп таң ғып…
***
«Құдайлардың» деймісің бәрі ақылды,
Бәрі әділ ме жаратын қара қылды?..
Үйлесімсіз үрдісті үлгі еткен – біз!
Ал Үйлесім Ғалам боп жаратылды.
***
Тұр ма өмірім алдында екіндінің?
Жеп тынардай желкілдеп жетілді мұң!
Ынтығу жоқ, елту жоқ ештемеге,
Бәрін көріп, баз кешкен секілдімін…
***
Ата болса арсыздық, өсек-ене,
Көгеретін, Құдай-ау, көсеге ме?!
Адам қылып жаратқан талайларың,
Неге ит болып кетеді өсе келе?
***
– Билікке келген байды өркөкірек,
Ешқашан, ей, пірәдар, көрме тірек!
Жансебіл іздеп одан бірде мен де,
Шыққамын шыққандай боп көрде түнеп.
***
Тарихтың мұхитында буырқанған,
Ғарық боп қанша ұрпақ, буын қалған…
Ал із-түзсіз кеткен заманының,
Ап шығар желбіретіп туын Тарлан!
***
– Тасыма біреу сені «Ерсің!» десе,
Жасыма біреу сені менсінбесе.
Бәрі де өтер-кетер, ұмыт болар…
Бұ жалған оңайлықпен берсін бе есе.
***
О да пенде. Жіберді бір әбестік.
Ұят ісін көз көрді, құлақ естіп.
Кешіре сал. Сен де ертең, кім біледі…
Өмір деген осы ғой, тұрады өстіп…
***
Жаһанды жатқан жырмен жайлап алып,
Ұлы Омар өтіпті бір жайға налып:
«Дүние-ай, сырыңды ашып үлгірмедім!..»
Ешкім де үлгірмейді. Айдан анық.
***
– Неге сонша бүліндің шатқаяқтап,
Саудайыны сабардай ақ таяқты ап?!
Ақ таяқтан ешкімге ес кірген емес,
Ал шатқаяқ шатақпен жатты аяқтап.
***
– Ей, өркен! Біз осы азат бола алдық па?
Азатпыз! Енді елге обалды ұқ та,
Ардақта Ана тілді!.. Жетті, шырақ,
Болуың жанды ескерткіш бодандыққа!
***
– О, Сұлулық тұнған түр, қылыққа да!
Өтінемін: тұтқын ғып құлыптама?
Махаббатпен өртеме…өртелгенмін…
Мен отызда емеспін, қырықта да…
***
Заманның тар ма сонша көші, легі?
Даналар неге өзара өшігеді?..
Ал Тарих оқып Заман шежіресін,
Қалдырса бірді, мыңды өшіреді…
***
Танығышпыз жақын мен алыстарды,
Айырғышпыз сүйем мен қарыстарды.
«Бөрібасар» деп қойып шәулімізді,
«Майлыаяқ» деп атаймыз арыстанды!..
***
Қош айтып жастық-құсқа ұшқан алдай,
Сондағы көрген қызық-түс таралмай,
Жүргенде сен жолықтың!.. Мен хал кештім,
Шұғланы уысымда ұстағандай…
***
Бұрын сөз жан күйдірсе шоқтай жанып,
Ар-намыс атысатын тоқтай қалып.
Ал қазір әз жүрекке еш қалқан жоқ,
Қарау сөз жарып жатыр оққа айналып!..
***
– Ей, жарқыным, барасың не деп тегі?!..
Жақсы болсаң кім сені елетпеді?
Бар міндеті әлде елдің: сені өмірі,
Алақанға салуы керек пе еді?!
***
Болмаса болашақсыз, соқыр жандар,
Сананың самаладай отын қамдар…
Ал, ертең қайтер екен қарабет боп,
Қыранын қуырып жеп отырғандар?
***
Алла өмірді сыйлық қып ұстатарда,
Кең болғанмен бұ Жалған қысса – тар да.
Тойлаған көп сонда да тайраң қағып,
Ал мен кеппін бір қиын іссапарға…
***
Тәубе Аллаға! Берді өмір – ең керекті,
Абыройдың – мың алғыс! – ел теңі етті.
Ал алақол фәни сәл еркелетсе,
Тек ата-анам арқылы еркелетті!
***
Ердана сөз қатса Өмір әр қырынан,
Үркіп кетпе кетер деп шарпып ылаң.
Сөз емес ол – сәуле ұшқан Болашаққа,
Санадағы жарылыс жарқылынан!
***
– Тағдыр тағы не деп тұр жарқылдарың?
Көп көрдің бе сәл ғана жан тынғанын?!..
Жебе ұстатқан жоқ ең ғой, неге керек
Адырнадай тағы да тартылғаным?..
***
– Ей, шырақ! Мен де жастық желікпенен,
«Болсам, – деп, – пәленшедей!» еліктегем.
Болғам жоқ! Қырық түрлі қылығымның
жемісін ащы-тұщы теріп келем…
***
– Сөзім емес, сеніңіз, уытты өктем:
жүрек гүлін ашқанда туып көктем –
көрмедіңіз!.. Жасанды гүл ұсынбан…
Кешіріңіз, мен сізден суып кеткем…
***
– Ассаң да асу сүрең сап, сен барлықпа,
Қоспа өзіңді аспасаң ең қалдыққа.
Бар кілтипан Бақта ғой…Ол қонбаса,
Ешек базар да алмайды делдалдыққа!
***
– Күнім ең ғой, қарағым, күлімдеген!..
Өзің барда еш тамұқ білінбеген.
Ендігі сый – қиямет қиқуы ма?..
Біртүрлімін, әйтеуір, бүгінде мен.
***
Әне, «өсті» бір қуың бұлтыңдаған,
Өмір бойы берген тек құлқынға мән!
Осындайды неліктен жаратады?..
Әлде бұзу үшін бе сұрқын ғалам?
***
Жарлыға бір бай былай деп күліпті:
– О, байғұс, менде бәрі жеткілікті!..
Оттапты! Жетсе осыны айтар ма еді,
Қай ақыл отыменен кеп кіріпті?!
***
Сені еш көрмесем де сен деп теңім,
Іздеумен бітті әлім, селдеп терім.
Жер-көкті сан жыл кезіп, таппадым-ау!..
Әлде әлі…дүниеге келмеп пе едің?
***
Дәрігер өлшеп әлек қан қысымын…
Кім өлшер қанды қысқан жан қысымын?
Ал жанды кім қысады? Мына жұрт па?..
Ғалам ба бүккен ішке мәңгі сырын?..
***
– Беттің бәрі кеткен жоқ ауыз болып,
Жұрттың бәрі кеткен жоқ жауыз болып! –
Болмаса осы Шындықтың титтей дәні,
Мына Өмірде қалар ма ек қауыз қорып?!
***
– О, Жалған! Жарылқадың елеп кімді?
Кім сенің жәрмеңкеңе не деп кірді?..
Мен байғұс білмей тұрмын түс ауса да:
таптым ба, таппадым ба керектімді?..
Тараз
3489 рет
көрсетілді0
пікір