- Тұлға
- 02 Тамыз, 2012
Ұлт басылымдарының жанашыры
Ақтөбе облысында 1997 жылы Мұғалжар және Октябрь аудандары біріктіріліп, Мұғалжар деген атаумен қайта құрылды. Орталығы – тоғыз жолдың торабында орналасқан Қандыағаш қаласы. Аудан аумағы 27 мың шаршы шақырымды алып жатыр. Халқының саны жетпіс мыңға жуық. Үш қаланы (Қандыағаш, Ембі, Жем), 12 селолық округті қамтитын өңірде теміржол көлігі, мұнай-газ өндіру және өңдеу, қиыршық тас шығару кәсіпорындары, ауылшаруашылығы құрылымдары шоғырланған. Аудан әкімінің орынбасары Жангелді Құрмашев әлеуметтік сала қызметіне тікелей жауап береді және облыста Ақтөбе қаласы мен аудандарда өз әріптестері арасында еңбек өтілі жағынан ең байырғысы. Бүгінгі әңгіме осы азамат жайында.
1986 жылғы жаз айларының бірі. Шалқар ауданының Шахты орта мектебінде директордың орынбасары болып жүрген Жангелді кешкі шай дастарқанында шұғыл шешімін айтты: – Әкемізді ақ жауып арулап, атамекендегі қорымға қойдық, жылдық садақасын бердік. Аруақ риза шығар. Енді мына жұмысымды тапсырып, Ембі қаласына көшеміз. Ауыл-үйге сүйкімді анасы Қоңыр баласының дидарына таңырқай қарады. Әңгімесін орнықты жеткізіп отыр. «Жарықтық әкесі өз ойынан қайтпайтын. Шіркін, аусайшы...» деді іштей. Сол кезеңде Мұғалжар деп аталатын аудан орталығындағы ағайын жаңадан көшіп келгендерді жатырқаған жоқ. Аудандық халық ағарту бөлімінің меңгерушісі Алтын Ысқақов жас маман жігерін аңғара білді ме, ойланбастан бөлім аппаратына әдіскер қызметіне қабылдады. Көп ұзамай әдіскерлік кабинетінің меңгерушісі, сәлден кейін мектеп директоры болды. Аудандық партия комитетінің бірінші хатшысы Бердіғали Әйтпенбетов Құрмашовты сырттай қадағалап жүреді екен. Еліміздің егемендігі жарияланған соң әкімдік басқару институты қалыптастырылғанда аудан әкімдігіне тағайындалған Әйтпенбетов Жангелдіні өзіне орынбасарлыққа шақырды. Осылайша азамат ғұмырында өрлеу сатысы басталды. Жиырма жыл бойына бір орында отырып, қазіргі басшы Серік Шаңғұтовты қоса есептегенде жеті әкімнің қол астында жұмыс істеген екен: жоғарыда сөз болған Бердіғали Әйтпенбетов, Павел Хохлов, Арынғазы Беркінбаев, Оңдасын Оразалин, Нұрлан Сейіткамалов, Елкей Әубәкіров. Әрқайсысы өзінің қабілет-қарымымен аудан экономикасын нығайтып, мәдениетін жақсартуға айтарлықтай еңбек сіңірді. Біздің кейіпкеріміз болса өзіне тікелей басшылық жасаған осы азаматтардан көп жайды үйренгенін айтудан жалыққан емес, теріс пікір білдіруді жаны сүймейді. Бұрынғы екі ауданның біріктірілуі нәтижесінде аумағы кеңейген өңірде өнеркәсіп саласында биылғы алты айда 270,1 млрд. теңгенің өнімі өндірілді, ауыл шаруашылығында жаңадан 8 шаруа қожалығы ашылды. Тұрғын үй бағдарламасы бойынша жалға берілетін және коммуналдық тұрғын үйлерді салуға республикалық бюджеттен 49 миллион теңге, ал облыстық бюджеттен 1 миллиард 225 миллион теңге бөлінді. Аудандағы жалпы білім беретін қырық жеті мектепте 10182 оқушы оқиды. Ұлттық бірыңғай тестілеу қорытындысынан облыс бойынша үшінші орын алу – ұстаздар қауымының тынымсыз еңбегіне айғақ. Денсаулық сақтау саласында жоғары білімді 52 дәрігер мен орта буынды 120 медициналық маман қызмет атқаруда. Өзіне де, өзгеге де қатаң талап қоятын, сөзге шешен, ісіне бекем, шежіреге жүйрік Құрмашевті журналистер қауымы әр кез құрметтеп жүргені. Аудан ұлттық баспасөздің таралымы жөнінен облыс бойынша алдыңғы қатарда. Жыл басында 1017 дана «Егемен Қазақстан», 3274 дана облыстық «Ақтөбе», 1187 дана «Ана тілі», 365 дана «Айқын», 313 дана «Дала мен қала» газеттерінің таратылуы – Жангелді мен оның қызметтес серіктері еңбегінің жемісі. Мемлекеттік тіл саясатын жүзеге асыруда, іс қағаздарын мемлекеттік тілде жүргізуде тұрғылықты қазақ ұлтымен бірге орыстар, украиндар, татарлар, немістер, молдавандар және басқа ұлт өкілдері қоныстанып, тату тірлік кешіп келе жатқан Мұғалжардың мәртебесі биік болып келеді. Аудан әкімдігі бұл ретте облыстық тілдерді дамыту басқармасымен байланысын үзген емес. Бірнеше медальдармен, Алғыс хаттармен марапатталған кейіпкеріміз өзінің 60 жасына зайыбы Базаргүлмен бірге қыз ұзатып, келін түсірген, бал күлкілі немерелер сүйген ата-әже ретінде жетіп отыр. Жанғабыл ҚАБАҚБАЕВ, журналист
3514 рет
көрсетілді0
пікір